Ambasadori Polak në ShBA thotë se sanksionet ndaj Moskës duhet të zgjasin për një dekadë

Marek Magierowski

Ambasadori i Polonisë në Shtetet e Bashkuara, Marek Magierowski, i tha CNN të enjten se sanksionet ndaj Rusisë duhet “të zgjasin për një dekadë, ndoshta 15 vjet”, pas pushtimit dhe sulmit të Moskës në Ukrainë. 

“Mendoj se nëse duam të hakmerremi për atë pushtim kundër Ukrainës me masa ndëshkuese dhe duke gjymtuar ekonominë ruse, ne duhet të jemi të vendosur dhe të gatshëm për të mbajtur sanksionet në një afat më të gjatë. Ndoshta ato duhet të zgjasin për një dekadë, ndoshta 15 vjet, sepse kam frikë se do të jetojmë me Putin për shumë vite në vijim,” tha Magierowski për CNN në një intervistë.   

Magierowski tha se forcat ruse kanë kryer “akte barbarie në Ukrainë” që ai tha se ishin “krime lufte, mizori”.

“Unë besoj dhe kam besim se zoti Putin dhe miqtë e tij dhe të gjithë ndihmësit e tij më të afërt do të përfundojnë në bankën e të akuzuarve, në Hagë, në Gjykatën Ndërkombëtare Penale, sepse kjo është ajo që ai tashmë e ka merituar plotësisht,” tha ai./Shqip.com