Liberalizimi i vizave: Afro 300 mijë qytetarë janë pajisur me pasaporta në vitin 2023

Na ndajnë edhe pak ditë nga 1 janari, kur hyn në fuqi liberalizimi i vizave për kosovarët.

E për të udhëtuar drejt shteteve të zonës Shengen, qytetarët duhet të jenë të pajisur me pasaportë të Kosovës.

Një numër i madh i qytetarëve kosovarë kanë aplikuar për t’u pajisur me këtë dokument.

Nga fillimi i vitit 2023, 287 mijë e 965 kosovarë janë pajisur me pasaporta.

Kështu ka bërë të ditur në një përgjigje për Front Online nga Ministria e Punëve të Brendshme.

“Qytetarë të pajisur me pasaporta për vitin 2023 gjithsej janë 287965”.

209 mijë e 755 qytetarë u pajisen me letërnjoftim gjatë 2023-tës

Numri i qytetarëve që janë pajisur me letërnjoftim gjatë 2023-tës ka shkuar te 209 mijë e 755.

Këtë statistikë e kanë bërë të ditur nga MPB-ja.

“Qytetarë të pajisur me letërnjoftime për vitin 2023 gjithsej janë 209755”, thuhet në përgjigjen e tyre.

Ndërsa, nga muaji janar 2023 e deri më tani, gjithsej 93 mijë e 385 shoferë të rinj u pajisen me patentë shofer.

Por, numri i qytetarëve që kanë aplikuar për herën e parë për këtë kategori është mbi 40 mijë.

“Qytetarë të pajisur me patentë shofer në vitin 2023 gjithsej janë 93385. Qytetarë të pajisur për herë të parë me patentë shofer këtë vit gjithsej janë 40308”, thuhet në përgjigjen e MPB-së.

Mbi 2 mijë qytetarë hoqën dorë nga shtetësia kosovare gjatë këtij viti

Për shkak se në shumicën e shteteve evropiane nuk lejohet dyshtetësia, shumë kosovarë gjatë 2023 hoqën dorë nga shtetësia e Kosovës.

2  mijë e 938 persona u liruan nga shtetësia.

“Gjatë periudhës janar-nëntor 2023 nga shtetësia e Republikës së Kosovës janë liruar 2,938 persona”, thuhet në përgjigjen e MBP-së.

Nga fillimi i këtij viti e deri më tani, 654 qytetarë kanë marrë shtetësi kosovare.

“Gjatë periudhës janar-nëntor 2023, kanë aplikuar 1,174 persona për fitim të shtetësisë së Republikës së Kosovës dhe prej tyre 654 persona kanë marrë shtetësinë e R. Kosovës”, thuhet tutje në përgjigjen e MPB-së.

Ndryshe, që nga tetori i 2022-tës deri në fund të janarit të 2023-tës, Kosova është përballur me mungesë të materialeve për prodhimin e disa dokumenteve si pasaporta, patentë shoferët e letërnjoftimet.

MPB pati bërë të ditur më 26 janar se gjatë asaj jave ishte pajisur me material bazik për prodhimin e dokumenteve personale.