Lëndohet Nadal e humb Mastersin e Monte Carlos

Rafael Nadal do të ketë sërish një ndalesë të detyrueshme.

Spanjolli nuk do të marrë pjesë në turneun Masters 1000 të javës së ardhshme që zhvillohet në Monte Carlo.

Rikthimi i kampionit spanjoll të rekordeve në Grand Slam në turneun e tenisit është shtyrë edhe më shumë.

Pas dëmtimit të muskujve, që e ka detyruar të bëjë një pushim që nga Australian Open, 36-vjeçari nuk do të jetë në gjendje të nisë sezonin evropian të fushës me balte në Monte Carlo.

“Nuk jam ende gati të luaj në nivelin më të lartë”, shkroi Nadal në “Twitter”.

Nadal ka fituar njëmbëdhjetë herë Mastersin në Principata, por triumfi i tij i fundit në Monako ishte pesë vjet më parë. Mbreti i fushës prej balte ka luajtur vetëm në Kupën e Bashkuar në Australi dhe në turneun Grand Slam në Melburn këtë vit dhe ka fituar vetëm një nga katër ndeshjet e tij. Së fundmi, Nadal kishte rënë nga top 10 në renditjen botërore për herë të parë në 18 vjet, transmeton AFP.

Gjithsesi Nadal ka ende kohë deri në pikën kryesore të sezonit. French Open fillon më 28 maj. Vitin e kaluar Nadal fitoi titullin e tij të 14-të në Paris.

Në përgjithësi, ky ishte triumfi i tij i 22-të në një nga katër turnetë e Grand Slamit. Ai ndan rekordin me rivalin e tij serb Novak Djokovic.