Lajçak: Marrëveshja finale më së largu në mars 2023

Përfaqësuesi i posaçëm i Bashkimit Evropian për dialogun Kosovë-Serbi, Miroslav Lajçak ka thënë se marrëveshja në mes palëve që ai ndërmjetëson do të jetë më së largu deri në mars të vitit 2023.

Siç raporton Politico, Lajçak ka thënë se ajo që është e rëndësishme është që situatat të mos kthehen në krizë.

“Ajo që është me të vërtetë e rëndësishme tani është të mos lejojnë që situata të kthehet në një krizë tjetër dhe është e rëndësishme për udhëheqësit e Kosovës dhe Serbisë që të fillojnë krijimin e një atmosferë të favorshme për diskutime produktive mbi normalizimin e marrëdhënieve”, tha Lajçak.

Lajçak këmbënguli se këto përpjekje nuk do të pushojnë, duke thënë se afati përfundimtar i marsit ka për qëllim të transmetojë seriozitetin e arritjes së një marrëveshjeje.

Sipas Politico, Komuniteti ndërkombëtar po ndjen një urgjencë në rritje për të zgjidhur çështjen duke ditur se si lufta e Rusisë është duke u tërbuar pranë dhe se Kremlini ka kohë që kërkon ta joshë Ballkanin larg BE-së.

Brukseli i është përmbajtur asaj se të gjitha marrëveshjet e mëparshme duhet të zbatohen dhe se Kosova do të përfitojë pasi do të rrisë kontrollin e qeverisë mbi punët e përditshme në veri.

Lajçak këmbënguli se koha e tanishme është ideale për një zgjidhje të çështjes Kosovë-Serbi dhe se nëse nuk arrihet momenti, mosmarrëveshja mund të zvarritet me dekada.

“Tani, kemi një organizim shumë të favorshëm: ne kemi vëmendjen e udhëheqjes së lartë në SHBA dhe Në Bashkimin Evropian dhe kemi bashkëpunim shembullor BE-SHBA – kështu që kjo është dritarja e vërtetë e mundësive, diku deri në dhjetor 2023 ose në fillim të vitit 2024,” tha ai.

Zgjedhjet e Parlamentit Evropian dhe zgjedhjet presidenciale të ShBA-së janë të dyja të planifikuara për një “vit super zgjedhor” në vitin 2024.

“Nëse gjërat nuk bëhen deri atëherë, do të na duhet të fillojmë përsëri nga e para. Në qoftë se kthehemi në krizë dhe përleshje, atëherë mund të harrojmë afatet përfundimtare”, paralajmëroi Lajçak.