Lajme

Kurti tregon se kur do t’i shtrëngoj duart me Vuçiqin

Albin Kurti & Aleksandër Vuçiq

Kryeministri i Kosovës, Albin Kurti thotë se papunësia, korrupsioni dhe Serbia janë tri sfidat më të mëdha për Kosovën.

Për shkak të provokimeve të synuara nga Serbia, Kurti kërkon rritjen e forcës mbrojtëse të NATO-s – dhe më shumë ushtarë gjermanë.

Krijimi i vendeve të reja të punës, veçanërisht për të rinjtë, është për Kurtin sfida e parë për Kosovën.

Ai thotë se për të krijuar vende të reja pune, Kosova ka nevojë për investime të huaja direkte dhe vende të reja pune të lidhura me to.

“I inkurajoj të gjitha kompanitë evropiane që të investojnë në Kosovë. Kemi parqe teknologjike si në Prizren, rritje të lartë të eksporteve dhe një fuqi punëtore të re dhe të trajnuar mirë.” – tha Albin Kurti në një intervistë për gazetën gjermane “Die Welt“.

Kryeministri i Kosovës, Albin Kurti dhe presidenti i Serbisë Aleksandar Vuçiq në Bruksel, 18 gusht 2022

Politika tatimore 

Kurti thotë se të ardhurat tatimore në Kosovë janë rritur së fundmi me 34 për qind dhe kjo pa bërë ndryshime në politikën fiskale. Sipas tij kjo do të thotë se njerëzit janë përsëri të gatshëm të paguajnë më shumë taksa, sepse e dinë që qeveria e tij nuk është e korruptuar.

Luftimi i korrupsionit

Si sfidë të dyti Kurti sheh luftën kundër korrupsionit. Sipas tij organet e ndjekjes penale dhe të drejtësisë duhet të jenë edhe më efikase dhe të marrin masa edhe më të rrepta.

Strukturat ilegale serbe

Sfida e tretë është sipas kryeministrit Kurti Serbia, të cilën ai e konsideron si kërcënim për Kosovën. Serbia tha ai për gazetën “Die Welt” po ndërton struktura ilegale, veçanërisht në veri të Kosovës, dhe vazhdon të mbajë lidhje shumë të ngushta me Rusinë.

Kurti foli edhe për ngritjen e barrikadave më 31 korrik në rrugët që të çonin tek pikëkalimet Jarinjë dhe Bërnjak.

“Trazirat e 31 korrikut nuk u shkaktuan nga qytetarët e thjeshtë të minoritetit serb në veri të Kosovës, por nga krimi i organizuar dhe oligarkët, të cilët janë në listën e pagave të Serbisë dhe të cilët në takimet në Beograd u informuan se çfarë duhet të bëjnë në Kosovë. Kjo ishte punë e porositur”, tha ai.

Kur u pyet se a është gati t’i shtrëngoj duart me presidentin Vuçiq dhe ta njeh Serbinë, Kurti tha se se për të arritur deri në këtë pikë, duhet që marrëveshja e dialogut mes dy vendeve ttë jetë ligjërisht e detyrueshme dhe e bazuar në njohjen reciproke. Një marrëveshje e tillë kërkon një shtrëngim duarsh”, përfundoi ai.

Më 18 gusht, Kurti dhe Vuçiq u takuan në Bruksel për dialogun me Serbinë.

Ky takim i ndërmjetësuar nga Bashkimi Evropian, nuk rezultoi me arritje të marrëveshjes pas tensioneve në veri të vendit. Një javë më pas, i dërguari amerikan për Ballkanin Perëndimor, Gabriel Escobar dhe emisari i BE-së për dialog, Miroslav Lajçak vizituan Kosovën dhe Serbinë.

Ata u takuan me udhëheqësit e të dy shteteve për të diskutuar për çështjen e targave dhe dokumenteve masë kjo që do hynte në fuqi më 1 shtator./Shqip.com