Kurti pas mbledhjes së dy qeverive: Duhet t’i tejkalojmë kufijtë hapësinorë, por jo ata kohorë për zbatimin e marrëveshjeve

Kryeministri i Kosovës, Albin Kurti, tha se duhet t’i tejkalojnë kufijtë hapësinorë por të mos i tejkalojnë kufijtë kohorë të zbatimit të marrëveshjet që u nënshkruan të premten, përcjell Shqip.com.

Në një konferencë për media pas mbledhjes së Qeverisë së Kosovës dhe Shqipërisë, Kurti u shpreh se si udhëheqës të institucioneve është koha e shtetit që mbahet me tatimet dhe taksat e qytetarëve.

“Faleminderit të gjithë anëtarëve të kabineteve tona qeveritare. Ju faleminderit për punën, angazhimin kontributin dhe t’i tejkalojmë kufijtë hapësinorë duke vajtur e ardhur tek njëri tjetri por të mos i kalojmë e tejkalojmë kufijtë kohorë të zbatimit të marrëveshjeve për të cilat dakordohemi tani sepse koha jonë si udhëheqës të institucioneve nuk është e jona, është kohë e shtetit që mbahet me tatimet dhe taksat e qytetarëve tanë dhe mirëmbahet prej qeverive tona të drejta”, u shpreh Kurti.

Ndërkaq, kryeministri i Shqipërisë, Edi Rama, tha se nga marrëveshjet e arritura mes dy qeverive, lajm i mirë për kosovarët është heqja e kontrolleve fizike në pikat kufitare.

“Eliminimi i të gjitha procedurave të dyfishta është obligimi ynë në të gjithë sektorët dhe faktikisht në rastin konkret krijimi i manualit të ri të përbashkët për procedura standarde të operimit në doganën e Durrësit është ky për atë që thash lidhur me një nivel tjetër të lëvizjes që vie në raport me procedurat doganore.

 Dua të nënvizojë se është lajm i mirë për qytetarët nga të dyja anët dhe posaçërisht për qytetarët e Kosovës që vërshojnë në ditë të rëndësishme festash, në fundjava apo gjatë sezonit veror në Shqipëri, tanimë më në fund është jetësuar krijimi i një regjimi të ri doganor për ta në kufi, duke pas parasysh domosdoshmërinë që të mos krijohen radha të pafundme e për kontrolle të dyfishta”, tha Rama.