Kurti e Vuçiq takohen në Slloveni, prezentë do të jenë edhe Merkeli e Macroni
Shqip
Kryeministri i Kosovës, Albin Kurti, dhe presidenti i Serbisë, Aleksandar Vuçiq, do të takohen të mërkurën në Slloveni.
Liderët e dy shteteve do të takohen gjatë pauzës mes dy sesioneve të Samitit mes Bashkimit Evropian dhe vendeve të Ballkanit Perëndimor, që po mbahet në Brdo të Sllovenisë.
Në këtë takim do të marrin pjesë edhe kancelarja gjermane, Angela Merkel dhe presidenti i Francës, Emanuel Makron, shkruan Euronews (edicioni në gjuhën serbe), transmeton Shqip.com.
“Serbia nuk e njeh Kosovën, Kosova nuk e njeh Serbinë e ndërkohë na duhet një marrëveshje”, ka thënë Kurti. “Fondet evropiane nuk shkojnë pa vlera evropiane”.
Kurti bashkë me liderët e tjerë të Ballkanit Perëndimor dhe liderët e Bashkimit Evropian pritet të nënshkruajë ndonjë marrëveshje midis BE-së dhe këtij rajoni të Ballkanit.
Në këtë samit për herë të parë një kryeministër i Spanjës, Pedro Sanchez, do të ulet në tavolinë me kryeministrin kosovar meqë për dallim nga hera e kaluar kur në krye të ekzekutivit spanjoll ishte Mariano Rajoy, Spanja ishte larguar nga samiti për shkak të Kosovës në Sofje të vitit 2018./SHQIP.com
