Kurti: Dialogu është mënyra e vetme për të gjetur zgjidhje në veri

“Dialogu është mënyra e vetme për të gjetur zgjidhje”.

Kështu ka thënë kryeministri i Kosovës, të dielën, pas një bisede që kishte me sekretarin Gjeneral të NATO-s, Jens Stoltenberg dhe përfaqësuesin e Bashkimit Evropian për Politikë të Jashtme dhe Siguri, Josep Borrell.

“Në bisedat telefonike sot me Borrellin dhe Stoltenbergun ne diskutuam sundimin e ligjit, paqen dhe sigurinë dhe nevojën për de-përshkallëzim në veri të Kosovës. Dialogu është mënyra e vetme për të gjetur zgjidhje”, deklaroi kreu i ekzekutivit në Twitter.

In phone conversations today w/ EUHR @JosepBorrellF & #NATO Sec.Gen. @jensstoltenberg we discussed rule of law, peace & security & the need for de-escalation in the North of Kosova. Dialogue is the only way to find just solutions.

— Albin Kurti (@albinkurti) September 26, 2021

Po atë ditë, kishte reagime nga NATO dhe Bashkimi Evropian për situatën në Veriun e Kosovës.

Sekretari i NATO-s, Jens Stoltenberg, deklaroi se dialogu është zgjidhja e vetme lidhur me situatën në veri.

Ndërsa, Josep Borrell, kërkoi që të largohen Njësitet Speciale të Policisë së Kosovës si dhe bllokadat nëpër rrugët kryesore të veriut.

Situata në Veriun e Kosovës

Sot ka shënuar dita e tetë që kur Njësitet Speciale të Policisë së Kosovës po qëndrojnë në pikat kufitare në Jarinje dhe Bërnjak – për ta zbatuar reciprocitetin në targa.

Kundërshtimi i serbëve lokalë ishte i menjëhershëm, pos protestave në rrugë ata edhe i bllokuan ato duke vendosur kamionë si pengesa.

Policët kosovarë duhet të ndjekin rrugë alternativa për t’iu shmangur pengesave.

Ndërsa, netët janë me zhurma – serbët këndojnë këngë nacionaliste.

Deklarata po aq nacionaliste kishte dhënë të martën presidenti i Serbisë, Aleksandër Vuçiq, duke thënë se “do i japin Prishtinës kohë t’i përmirësojnë gabimet ose do të marrin masa”.

Ndërsa, ministri i Punëve të Brendshme, Aleksandër Vulin, po pret pikërisht urdhrin e Vuçiqit për intervenim.

Nuk janë veç fjalë – disa veprime janë bërë tashmë.

Gjatë dy ditëve të fundit helikopterët serbë shihen duke patrulluar në kufirin Kosovë – Serbi.

Ushtria e Serbisë është e pozicionuar afër kufirit me Kosovën.

Ndërkaq, brenda kufirit të Kosovës, të shtunën është sulmuar me granata Qendra për Regjistrimin e Automjeteve në Zubin Potok. /Shqip.com