Kryeministrja franceze për rritjen e moshës së pensionimit: Punoni edhe dy vite

Pas vitit 2030, francezët duhet të dalin në pension vetëm nga mosha 64 vjeç me pension të plotë. Kundër kësaj janë opozita e majtë dhe sindikatat.

Në 64 apo 65? Kjo ishte pyetja në Paris deri në fillim të javës. Qeveria dhe partia konservatore e opozitës Les Républicains (LR) e kishin të qartë se mosha e daljes në pension duhej të rritej për të financuar sistemin e pensioneve shtetërore – ngjashëm me vendet e tjera.

Mendim të kundërt kanë sindikatat dhe e majta politike, të cilët e refuzojnë këtë reformë si të panevojshme financiarisht dhe të padrejtë shoqërore.

Kryeministrja Elisabeth Borne, zbuloi detajet të martën në mbrëmje. Futja graduale e moshës së pensionit 64 do të thotë që të lindurit pas vitit 1961 do të duhet të punojnë më gjatë.

Si një lloj jastëku social kundër kësaj pilule të hidhur për punëtorët e sotëm, projektligji duhet të garantojë tashmë një pension të plotë minimal prej 1200 euro në muaj dhe gjithashtu t’u mundësojë punëtorëve në punë veçanërisht të lodhshme (si punëtorët e rëndë) të dalin në pension më herët.

Megjithatë, detajet e kësaj janë ende në diskutim dhe nuk ka gjasa të jenë objekt i ndryshimeve të shumta në Parlament deri më 6 shkurt.

Debati i ardhshëm parlamentar rrezikon të bëhet shumë i gjallë. Gjithashtu janë paralajmëruar protesta masive. Për herë të parë në 12 vjet, federatat sindikaliste rivale janë të bashkuara në rezistencë, sepse i shohin masat e zbuluara të martën si një sulm frontal. Pa shumë shpresë, qeveria ishte përpjekur të bindte kundërshtarët për sensin e reformës.

Megjithatë, për partitë e majta opozitare nuk kishte asgjë për të diskutuar. Përkundrazi, ky propozim u mundëson atyre të mbrojnë aleancën e tyre NUPES (Sindikata e Re Popullore Ekologjike dhe Sociale) në parlament me unitetin demonstrues në rrugë.