Kryeministri i Japonisë viziton Ukrainën

Kryeministri japonez Fumio Kishida po bën një udhëtim të papritur në Ukrainë të martën për të takuar presidentin ukrainas Volodymyr Zelensky – një ditë pasi udhëheqësi kinez Xi Jinping u takua me homologun e tij rus Vladimir Putin në Moskë.

Kishida  tashmë është larguar nga India, ku u takua me kryeministrin Narendra Modi dhe tani është në rrugën e tij për në Ukrainë, sipas transmetuesit publik japonez NHK.

Udhëtimi i tij është hera e parë që një kryeministër japonez viziton një vend apo rajon me luftime të vazhdueshme që nga Lufta e Dytë Botërore, raportoi NHK.

Kjo do të jetë gjithashtu vizita e parë në Ukrainë nga një anëtar aziatik i grupit G7 dhe e para nga një aleat i SHBA-së në rajon.

Përballë këmbënguljes në rritje të Kinës dhe shtrirjes globale, Japonia dhe Shtetet e Bashkuara janë afruar më shumë vitet e fundit, veçanërisht në lidhje me sigurinë rajonale dhe bashkëpunimin e inteligjencës.

Japonia është gjithashtu një anëtare e Quad, grupi informal i fokusuar në sigurinë që përfshin Indinë, Australinë dhe Shtetet e Bashkuara.

Kishida ka folur më parë me forcë kundër pushtimit të fqinjit të saj nga Moska, duke paralajmëruar vitin e kaluar se “Ukraina sot mund të jetë Azia Lindore nesër”.

Muajin e kaluar, në prag të përvjetorit të një viti të pushtimit, Japonia  premtoi 5.5 miliardë dollarë  ndihmë humanitare për Ukrainën, duke katërfishuar kontributet e mëparshme të Tokios, raporton CNN.