Krasniqi i dërgon letër Kurtit lidhur me situatën në Kosovë

Kryetari i Partisë Demokratike të Kosovës, Memli Krasniqi I ka dërguar letër kryeministrit të Kosovës, Albin Kurtit lidhur me situatën në veri.

Në letrën dërguar Kurtit, thuhet se PDK është  e gatshme për komunikim të hapur dhe për të ndihmuar institucionet në vazhdimin e ushtrimit të sovranitetit në territorin e Kosovës.

“Kosovës i duhen veprime të përgjegjshme që ruajnë stabilitetin e shtetit tonë. Me këtë rast, jua shpreh gatishmërinë e Partisë Demokratike të Kosovës për të komunikuar hapur dhe në vazhdimësi rreth situatës së krijuar në pjesën veriore të vendit, si dhe për të ndihmuar institucionet në vazhdimin e ushtrimit të sovranitetit në çdo pjesë të territorit tonë”, thuhet në letrën e PDK-së

Përmes kësaj letre, Krasniqi e ka cilësuar shqetësuese situatën në veri të Kosovës.

“Zhvillimet e fundit në komunat e pjesës veriore të Republikës së Kosovës janë shqetësuese. Tërheqja nga detyra dhe përgjegjësitë institucionale e Kryetarëve të Komunave, asamblistëve komunal, zyrtarëve policor, punonjësve të sistemit të drejtësisë e të administratës publike, përbën një akt të paprecedent dhe krijon situatë mjaftë problematike për Republikën e Kosovës”.

Sipas Krasniqit, këto veprime cenojnë sovranitetin juridik të Kosovës.

Gjatë ditës së sotme, deputetet e Listës Serbe kanë dorëzuar mandatet e tyre në Kuvendin e Kosovës.

Në njoftimin e Kuvendit të Kosovës thuhet se dhjetë deputetë nga Lista Serbe kanë dorëzuar dorëheqjet e tyre dhe ato janë të parevokueshme.

Dorëheqjet e tyre i kanë ofruar edhe rreth 150 zyrtarë të komunitetit serb në Gjykatën Themelore në Mitrovicë.

Kujtojmë se Lista Serbe ka bojkotuar institucionet e Kosovës pas vendimit të Qeverisë për pezullimin nga puna drejtorin rajonal të Policisë në veri, Nenad Gjuriq.

Po të njëjtën ditë, shumë pjesëtarë të komunitetit serb në Policinë e Kosovës kanë zhveshur uniformat e tyre.

Dorëheqjet e tyre kanë vazhduar edhe në ditët pasuese – në mesin e dorëheqjeve janë edhe ato të katër kryetarëve të komunave me shumicë serbe.

Dje është mbajtur edhe një protestë ne veri të Kosovës në të cilën u kërkua formimi i Asociacionit të Komunave me Shumicë Serbe.

Lista Serbe ka njoftuar se ata nuk do të kthehen në institucione derisa të largohet vendimi për targat si dhe deri në formimin e Asociacionit.