Kosova U20 vazhdon me fitore në Kampionatin Evropian

Kombëtarja e Kosovës në basketboll ka arritur të shënoj fitoren e radhës në FIBA Kampionatin Evropian, Divizioni B për meshkuj U20.

Kosova U20 mposhti Rumaninë me rezultat 79:82.

Çereku i parë ishte kryesisht i barabartë, ku epërsinë më të lartë e kishin rumunët, 19:14, ndërsa kjo pjesë përfundoi 27:28.

Dardanët vazhduan me lojë të mirë në periudhën e dytë, për të arritur epërsinë më të lartë, dhjetë pikë, 33:43, ndërsa shkuan në pushim me rezultat 41:47.

Basketbollistët e rinj të Kosovës edhe në periodën e tretë kishin epërsi deri në nëntë pikë, 48:57, por rumunët në fund të kësaj pjese, u këndellen, për të ngushtuar rezultatin në 58:61, sa ishin shifrat në semafor pas 30 minutash.

Në dhjetë minutat e fundit u zhvillua lojë interesante. Dardanët ishin në epërsi konstante, kurse Rumania përpiqej me të gjitha forcat për të rikthyer rezultatin, megjithatë, nuk ia arriti qëllimit dhe Kosova triumfoi 79:82.

Te Kosova u dalluan Don Polloshka me 17 pikë, Bardh Istrefi me 13 pikë e katër kërcime, Drilon Shala me gjashtë pikë e 13 kërcime dhe në momentet vendimtare, i jashtëzakonshëm ishte Fatlind Shoshaj me shtatë pikë radhazi nga tetë sa shënoi gjithsej.

Kosova U20 nesër do të përballet me fituesin e ndeshjes Zvicra-Hungaria. Kjo ndeshje zhvillohet për vendet 9-12./Shqip.com