Kosova sërish fiton ndaj Zvicrës
Shqip
Përfaqësuesja e Kosovës në basketboll e ka mposhtur si mysafire Zvicrën në kuadër të raundit të tretë parakualifikues të Eurobasket 2025.
Ndeshja u zhvillua në palestrën “Site Sportif Saint-Leonard” të Fribourgut, në të cilën Dardanët fituan me shifrat 76:72 (20:21, 15:18, 21:22, 20:11).
Basketbollistët më të dalluar te Kosova ishin Dominic Artis me 20 pikë, gjashtë kërcime e katër asistime dhe Drilon Hajrizi me 17 pikë e tetë kërcime.
Në anën tjetër, më i miri te Zvicra ishte Brunelle Tutonda me 15 pikë, tre kërcime e një asistim.
Në ndeshjen e kaluar si vendase, Kosova e mposhti Zvicrën në “Sezai Surroi” me rezultat të thellë 76:49.
Tani, Kosova ka një bilanc prej dy fitoreve dhe një humbjeje në Grupin H të kualifikimeve të Eurobasket 2025, bilanc ky i cili e rendit në pozitën e dytë me katër pikë, aq sa ka edhe Danimarka në vendin e parë, por me një ndeshje më pak të zhvilluar.
Ndeshja e radhës për Kosovën është si vendase kundër Danimarkës më 5 gusht me fillim nga ora 20:45.
/Shqip.com
