Ekonomi

Komunat i dorëzojnë listat e pagave – a do të paguhen grevistët?

Drejtori i Asociacionit të Komunave të Kosovës, Sazan Ibrahimi

Kryetari i Asociacionit të Komunave të Kosovës ka njoftuar se tashmë kanë dorëzuar listën e pagave.

Ai ka thënë se një gjë e tillë është obligim ligjor.

“Listat e pagave tashmë janë dorëzuar nga ana e komunave sepse një praktikë e tillë është obligim ligjor”, ka thënë Ibrahimi për SHQIP.com.

Dje gjatë një paraqitje për media ministri, Hekuran Murati bëri thirrje sërish komunave të Kosovës që t`i dorëzojnë listat e atyre që janë në grevë dhe për këtë ka thënë se afati ka qenë 10 shtatori.

“Ne çfarë kemi thënë është se Ligji për grevat e parasheh se në momentin kur shpallet greva, pezullohen marrëdhëniet kontraktuale në mes punëdhënësit dhe punëmarrësit. Ne kemi kërkuar nga komunat që këtë ta zbatojnë. Muajin e kaluar, komunat janë arsyetuar se nuk kanë mundur t’i përditësojnë listat, kurse tani ka qenë mundësia që listat të dorëzohen më 10 shtator”, është shprehur ai.

Ministri i Financave, Punës dhe Transfereve, Hekuran Murati.

Ai ka sqaruar se për të gjitha vendimet do të bazohen në legjislacionin në fuqi, që sipas tij kërkon që të bëhet auditimi i veçantë për këto çështje dhe të shihet nëse ka pasur mashtrim, deklarim të rremë në listat e pagave dhe është dëmtuar buxheti.

“Do të shohim se si janë deklaruar ato dhe në varësi të paraqitjes së gjendjes faktike nga ana e komunave do të procedojmë me hapat që parasheh legjislacioni në fuqi”, shtoi ai.

Kjo, sipas tij, nuk është as vendim e as dëshirë e qeverisë.

“Dëshirë e jona do të ishte që fëmijët të kthehen në mësim, mësimdhënësit të vazhdojnë shkollimin duke e ditur se e kanë mbështetjen e qeverisë”.

Ndryshe, në grevë nga 25 gushti janë mësimdhënësit, edukatorët në kopshte publike, punëtorë të administratës publike, shërbyesit civilë në institucionet lokale dhe qendrore të Kosovës./SHQIP.com

Shqip.com
Çmimet e derivateve në Kosovë Çmimi maksimal i lejuar për secilin produkt të naftës.
  • Dizel: 1.61
  • Benzine: 1.34
  • Gas: 0.76
Sot : 30/09/2022