Komuna e Obiliqit nuk pagoi shtatë fatura në vlerë prej 78 mijë euro brenda afatit kohor

Komuna e Obiliqit nuk ka arritur që të paguaj shtatë fatura në vlerë prej 78 mijë euro në afatin e paraparë kohor.

Kjo është bërë e ditur në bazë të raportit të Zyrës së Auditorit të Përgjithshëm.

“Pesë (5) fatura për mallra dhe shërbime në vlerë totale 10,318€, dhe dy (2) fatura për investime kapitale në vlerë 68,190€ nuk ishin paguar brenda afatit kohor ligjor prej 30 ditëve. Vonesat ishin nga 8 ditë deri në 6 muaj” thuhet në raportin e ZKA-së.

Nga ZKA-ja kanë kërkuar që Kryetari i Komunës  duhet të sigurojë se obligimet financiare ndaj kontraktuesve paguhen brenda afatit kohor ligjor prej 30 ditëve nga pranimi i faturës.

Por kjo nuk del të jetë shkelja e vetme e bërë nga Komuna e Obiliqit.

Komuna e Obiliqit del se të një kontratë publike në vlerë prej 40 mijë euro e ka nënënshkruar pa zotim paraprak nga SIMFK-ja.

“Kontrata publike për Furnizim me dru dhe pelet për institucionet shkollore në vlerë 40,000€ ishte nënshkruar pa zotim paraprak të mjeteve financiare në SIMFK. Zotimi dhe Urdhërblerja ishin bërë 45 ditë pas nënshkrimit te kontratës, përkatësisht pas skadimit të kontratës e cila kishte afat realizimi 10 ditë” thuhet në raportin e ZKA-së.

Kjo ka ndodhur për shkak të kontrolleve të pamjaftueshme në proceset e prokurimit publik.

Shkelja e rradhës nga Komuna e Obiliqit sipas ZKA-së ka të bëjë me bashkëfinancimin e projektit për përkrahje të familje me ferma të vogla.

“Bashkëfinancimi i projektit për përkrahjen e familjeve me ferma të vogla në rritjen, zhvillimin dhe prodhimtarinë e tyre bujqësore e blegtorale (sera) në vlerë 50,000€, është paguar nga buxheti i investimeve kapitale, ndonëse natyra e shpenzimit ka të bëjë me subvencione dhe transfere” thuhet në raportin e ZKA-së.

Po ashtu del se Komuna punësoi tre mësimdhënës pa zhvilluar ndonjë procedurë të rekrutimit./Shqip.com