Kishte gjuajtur me armë pas fitores së PDK-së në Skënderaj, arrestohet i dyshuari

Një person është arrestuar të hënën pasi që dyshohet se të dielën, më 17 tetor, pas përfundimit të procesit zgjedhor, kishte shtënë me armë në sheshin e Skënderajt, përcjell Shqip.com.

Lidhur me këtë, Policia e Kosovës ka njoftuar se nga i dyshuari është sekuestruar një revole dhe një karikator me pesë fishekë.

Për këtë rast është konsultuar prokurori i shtetit, me vendim të të cilit, i dyshuari është liruar për në procedurë të rregullt.

“Pas një pune hetimore me datë 18.10.2021 është arrestuar i dyshuari mashkull kosovar pasi që  dyshohet se kishte shtënë me armë zjarri. Nga i dyshuari është sekuestruar një revole me një karikator dhe pesë fishek. Në lidhje me rastin është konsultuar prokurori i shtetit i cili ka rekomanduar që pas intervistimit i dyshuari të lirohet në procedurë të rregullt”, njofton Policia.

Ndryshe, të dielën janë mbajtur zgjedhjet lokale në Kosovë, ku në Skënderaj, sipas rezultateve preliminare të Komisionit Qendror Zgjedhor, fitues është kandidati i Partisë Demokratike të Kosovës, Fadil Nura me 57.99 për qind të votave.

Pas këtyre rezultateve, aktivistët e këtij subjekti politik kishin dalur që ta festojnë fitoren duke shtënë disa herë me armë zjarri, ku një person është lënduar.

Nura kishte për kundërkandidat Bekim Jasharin i cili ishte kandidati i pavarur dhe Sokol Halili, po ashtu i pavarur./SHQIP.com