Hoti: Askush nuk po merret me zhvillimin ekonomik dhe punësimin

Ish-kryeministri i Kosovës, Avdullah Hoti ka dhënë Kritika për Qeverinë e Kosovës dhe konkretisht për zhvillimin ekonomik.

Përmes një postimi në Facebook, Hoti thotë se askush nuk po merret me zhvillimin ekonomik dhe punësimin.

“Askush nuk flet as nuk merret me zhvillim ekonomik dhe punësim. Nuk e sheh një ngjarje të vetme ku promovohet një fabrikë e re apo një projekt i ri. Si u katandisëm kështu”, shkroi Hoti.

Veç tjerash, Hoti listoi edhe disa probleme ekonomike me të cilat po përballët vendi.

“Në janar u rrit tatimi në pronë për 100%. Nga prilli rritet energjia me 15%.  Çmimet e konsumit mbesin të larta. Investimet kanë rënë në nivelin më të ulët për shumë vite. Rritja ekonomike ka rënë nga 10% në 3% që nuk mjafton për të mbuluar as amortizimin. Kursimet prej 2.5 miliardë euro në Trustin Pensional janë në mëshirë të tregut pasi Trusti nuk ka Bord. Banka Qendrore nga java tjetër mbetet pa Guvernator”.

Sipas Hotit, investimet kapitale të shtetit janë të papërfillshme pasi asnjë ministri nuk po punon gjë.