Haradinaj takim me Lajçak: Ripërserita qëndrimet tona për dialogun
Shqip
Kryetari i Aleancës për Ardhmërinë e Kosovës, Ramush Haradinaj ka pritur në takim Përfaqësuesin Special të BE-së për dialogun Kosovë – Serbi, Miroslav Lajçak.
Haradinaj ka njoftuar se gjatë takimit ka ripërsëritur qëndrimet e tij për dialogun.
“Në takim me Përfaqësuesin Special të BE-së për dialogun Kosovë – Serbi, z. Miroslav Lajčak, ripërsërita qëndrimet tona për dialogun, domosdoshmërinë e rolit strategjik të Shteteve të Bashkuara të Amerikës dhe përkushtimin tonë për një Marrëveshje Gjithëpërfshirëse ligjërisht të obligueshme, e cila ka epilog njohjen reciproke mes dy vendeve”, ka shkruar ai.
Kreu i AAK-së ka bërë të ditur se ka falënderuar Lajçak për angazhimin e tij dhe të Bashkimit Evropian në këtë proces të rëndësishëm për Kosovën.
Lajçak është takuar edhe me kreun e Partisë Demokratike, Memlin Krasniqi.
Krasniqi në Facebook ka njoftuar se me Lajçak kanë biseduar për hapat e mëtutjeshëm që pritet të ndermirën në dialogun Kosovë – Serbi.
Në pasditen e së hënës, Lajçak është takuar edhe me kryeministrin e Kosovës, Albin Kurti me të cilin ka thënë se kanë diskutuar për çështjen e dialogut me Serbinë.
Lajçak ka thënë se e ka përgëzuar Kurtin për arritjen e marrëveshjes për energjinë./Shqip.com
