Grenell dëshmon në hetimin e dokumenteve të klasifikuara në Mar-a-Lago ndaj Trump

Ish-drejtori në detyrë i Inteligjencës Kombëtare, Richard Grenell dëshmoi të enjten përpara një jurie të madhe që hetonte trajtimin e dokumenteve të klasifikuara nga Donald Trump.

CNN e identifikoi Grenellin teksa po largohej nga gjykata në Uashington, DC.

Grenell u thirr për të dëshmuar në hetimin e vazhdueshëm penal të prokurorit special Jack Smith, sipas një burimi të njohur me këtë çështje.

Ndërsa shërbente në administratë , Grenell filloi një përpjekje për të deklasifikuar dokumentet që ishin me interes për Trump, sepse presidenti i atëhershëm besonte se ato mund të delegjitimonin hetimin për Rusinë.

Grenell mbeti në orbitën e Trump edhe pasi ish-presidenti la detyrën dhe është parë në resortin e tij Mar-a-Lago javën e kaluar.

Grenell ka komentuar gjithashtu publikisht për mbajtjen e dokumenteve të klasifikuara nga Trump dhe pretendimet ende të paprovuara të ish-presidentit se materialet që ai mbante ishin deklasifikuar.

“Ishin të gjitha dokumente të deklasifikuara (jo të aksesueshme në mënyrë dixhitale) dhe të mbajtura në zyrën e një ish-presidenti – të ruajtura nga Shërbimi Sekret i Shteteve të Bashkuara”, tha Grenell në një postim në Twitter të gushtit 2022 .

E njëjta juri e madhe që heton dokumentet e mbajtura në Mar-a-Lago ka dëgjuar gjithashtu dëshmi nga ish-këshilltari i Trumpit për sigurinë kombëtare, Robert O’Brien. Ai u shfaq në fillim të këtij viti dhe iu përgjigj pyetjeve në lidhje me bisedat që kishte me Trump para se të largohej nga detyra, sipas burimit të njohur me këtë çështje.

CNN raportoi në atë kohë se O’Brien u pa në një gjykatë federale të DC në fillim të këtij viti pasi mori një thirrje nga ekipi i Smith si në 6 janar 2021, ashtu edhe në hetimet e dokumenteve.

Trump ka pohuar vazhdimisht se ai kishte fuqinë për të deklasifikuar gjithçka që dëshironte dhe madje mund ta bëntë këtë vetëm duke e menduar.