Gratë që punësohen në Kosovë do të subvencionohen me 50 për qind të pagës për tre muaj

Ministri i Financave, Punës dhe Transfereve, Hekuran Murati, të enjten ka nënshkruar vendimin për përcaktimin e kritereve dhe kushteve lidhur me operacionalizimin e masës 1.3 të Pakos së Ringjalljes Ekonomike – Mbështetja e punësimit të grave.

Sipas njoftimit të ministrisë, përmes masës 1.3, secilës prej grave të punësuara do t’i bëhet subvencionim i pagës deri në 50% (pesëdhjetë për qind) të pagës bruto mujore për 3 (tre) muaj, duke filluar nga periudha tatimore korrik 2021 e tutje, përcjell Shqip.com.

Pas përfundimit të periudhës tremujore, do të subvencionohen kontributet pensionale për muajt e mbetur, konform kritereve dhe kufizimeve të përcaktuara me vendimin për zbatimin e masës 1.2 të Pakos së Ringjalljes Ekonomike.

Kusht për subvencionim është që e punësuara të mos figurojë në deklaratën e muajit qershor 2021 në Administratën Tatimore të Kosovës.

“Kjo masë reflekton edhe një ndër prioritetet e Qeverisë së Republikës së Kosovës që qëllim kryesor ka fuqizimin e grave në tregun e punës. Punësimi i grave është tejet i rëndësishëm ashtu që të kemi një rritje ekonomike gjithëpërfshirëse dhe shoqëri përparimtare”, thuhet në komunikatën për media.

“Për të përfituar nga subvencioni, punëtoret e reja duhet të deklarohen nga punëdhënësi në deklaratën e rregullt mujore që dorëzohet në sistemin elektronik EDI të ATK-së. Pasi të jetë bërë deklarimi, punëdhënësi duhet të plotësojë formularin e kërkesës për subvencionim, po ashtu përmes sistemit EDI”.

Aplikimi për subvencion nga Masa 1.3 do të mund të bëhet deri më datë 15.10.2021.

Për hapjen dhe udhëzuesin e aplikimit, Ministria e Financave, Punës dhe Transfereve thotë se do të njoftojë publikun gjatë ditëve në vijim./SHQIP.com