Grabitje me armë në dyqanin luksoz në Paris (VIDEO)
Një grabitje me armë ka ndodhur në një dyqan bizhuterish të markës luksoze Bulgari, në Paris.
Grabitja e dyqanit luksoz ka ndodhur në mes të ditës, dy ditë më parë, ndërkohë sot janë publikuar dhe pamjet e grabitjes të filmuara nga kalimtarët në rrugë.
Dyqani i bizhuterive luksoze ndodhet në qendër të Parisit, ku tre persona që lëviznin me dy motoçikleta hynë në dyqan. Në videon e publikuar shihen dy motoçikleta të mëdha, të zeza, të parkuara në trotuarin përpara dyqanit të bizhuterive.
Një burrë me helmetë i armatosur dhe i veshur me rroba të zeza shihet duke qëndruar roje. Më vonë, nga dyqani i bizhuterive dalin dhe dy grabitësit e tjerë që mbajnë dhe çantat me bizhuteritë e vjedhura.
Shkalla e dëmit dhe vlera e bizhuterive që ata morën është ende duke u vlerësuar nga ekspertët.
I njëjti dyqan u vu në shënjestër edhe të një grabitje të armatosur në shtator të vitit 2021, dëmi i së cilës u vlerësua në 10 milionë euro.
/Shqip.com