Gjukanoviq: E mbështesim Kosovën në rrugën e saj evropiane

Presidenti i Malit të Zi, Millo Gjukanoviq, pas takimit me presidenten e Kosovës, Vjosa Osmani, ka deklaruar se e mbështesin Kosovën në rrugën e saj drejt integrimit në Evropë.

Ai shtoi se në këtë kontekst, Mali i Zi i kupton ambiciet e Kosovës për t’u bërë anëtare e Këshillit të Evropës.

“Ne e kuptojmë nismën e tyre për të marrë statusin e kandidatit për në BE. Ne e mbështesim fuqimisht dhe mendojmë se është e vetmja qasje e përgjegjshme ndaj ambicieve të Kosovës dhe çdo vendi tjetër në rajon”, tha Gjukanoviq.

Ai shtoi se deficiti themelor i rajonit mund të eliminohet vetëm përmes integrimit.

“Prandaj edhe vullneti ynë për të bashkëpunuar për këto çështje me të gjithë fqinjët tanë. Ne besojmë se kjo është mënyra e vetme për të konsoliduar stabilitetin”, tha Gjukanoviq.

Siç vlerësoi ai, regjimi pa viza për qytetarët e Kosovës është hapi i parë i rëndësishëm dhe se vizita e Osmanit do të forcojë besimin mes dy vendeve.

“Besoj se pas konsolidimit të pushtetit ekzekutiv në Mal të Zi dhe pres zgjedhjet parlamentare së shpejti dhe pas përfundimit të suksesshëm të procesit të negociatave për marrëveshjen ndërmjet Kosovës dhe Serbisë, do të krijohen kushte më të mira për angazhim të plotë në marrëdhëniet bilaterale dhe për prosperitetin e mëtejshëm të marrëdhënieve tona”, tha Gjukanoviq.

Siç ka thënë ai, Mali i Zi po ndjek me kujdes gjithçka që ndodh në negociatat mes Kosovës dhe Serbisë.

“Besojmë se ky dialog ka nisur me sukses dhe se mund të fitojë dinamikë dhe cilësi të re. Jemi të bindur se është e mundur të arrihet një marrëveshje e qëndrueshme afatgjatë, duam ta mbështesim Kosovën si fqinjë të përgjegjshëm”, tha ai.

Ndërsa, presidentja Osmani ka vlerësuar se anëtarësimi i Malit të Zi në NATO ka kontribuar shumë për paqen dhe stabilitetin në rajon.

“NATO është qëllimi ynë strategjik, vendet tona vazhdojnë të jenë të fokusuara në një rrugë të qartë drejt BE-së. Integrimi i plotë i Malit të Zi dhe Kosovës në strukturat euroatlantike nuk është opsion, por domosdoshmëri”, tha Osmani Sadriu.

Ajo tha se beson se Mali i Zi mund ta ndihmojë shumë Kosovën, sepse tashmë ka ndërmarrë hapa të rëndësishëm në rrugën drejt BE-së, raporton RTCG.

“Sa më shumë zëra nga rajoni ta mbështesin Kosovën në rrugën euroatlantike, aq më shumë do të rritet mbështetja nga vendet që gjeografikisht janë larg nesh”, tha Osmani.

Ajo ka kujtuar se Mali i Zi ka përkrahur Kosovën në të gjitha organizatat ndërkombëtare ku ka aplikuar për pranim si shtet.