Gjermania dhe BE-ja arrijnë marrëveshje për përdorimin e motorëve me djegie

Gjermania dhe BE-ja kanë arritur një marrëveshje për t’i dhënë fund një mosmarrëveshjeje të vazhdueshme mbi të ardhmen e automjeteve me motorë me djegie.

“Automjetet me motorë me djegie të brendshme mund të regjistrohen ende pas vitit 2035 nëse mbushen ekskluzivisht me karburante neutrale ndaj CO2”, njoftoi të shtunën në Twitter ministri gjerman i Transportit Volker Wissing.

Ai tha se marrëveshja do të siguronte mundësi për Evropën duke mbajtur opsione të rëndësishme për lëvizshmëri neutrale ndaj klimës dhe të përballueshme.

Frans Timmermans, nënkryetar ekzekutiv për Marrëveshjen e Gjelbër Evropiane, gjithashtu konfirmoi marrëveshjen.

“Ne kemi gjetur një marrëveshje me Gjermaninë për përdorimin e ardhshëm të e-karburanteve në makina”, shkroi ai në Twitter, raporton Anadolu.

“Ne do të punojmë tani për miratimin e standardeve të CO2 për makinat sa më shpejt të jetë e mundur dhe Komisioni (Europian) do të ndjekë me shpejtësi hapat e nevojshëm ligjorë,” shtoi ai.