Gërvalla në Tokio flet me drejtuesit e JICA-s dhe Bankës Japoneze për projektet për zhvillim ekonomik

Ministrja e Jashtme, Donika Gërvalla, në Tokio të Japonisë ka zhvilluar takime të ndara me drejtuesit e Agjencisë Japoneze për Bashkëpunim Ndërkombëtar (JICA) dhe Bankës Japoneze për Bashkëpunim Ndërkombëtar (JBIC).

“Përfundimi me sukses të lartë i projekteve, donacioneve dhe investimeve japoneze në Kosovë dhe realizimi i projekteve dhe investimeve të reja ishin temat kyçe të diskutimit”, tha MPJD në një komunikatë për media.

Gjatë takimit në zyrat qendrore të JICA-s,  Gërvalla falënderoi drejtuesit e kësaj agjencie për mbështetjen e dhënë Kosovës ndër vite në rindërtim, ngritje të kapaciteteve humane dhe infrastrukturore, mbrojtje të mjedisit, menaxhim të mbeturinave dhe në fushën e përmirësimit të ajrit.

“Në takim me përfaqësuesit e Bankës Japoneze për Bashkëpunim Ndërkombëtar, Ministrja Gërvalla vuri në pah potencialin në fushën digjitale dhe të teknologjisë informative, si përparësi të rëndësishme të të rinjve, të cilat mund të shërbejnë si një mundësi e mirë e investimeve strategjike japoneze në Kosovë, në ngritjen e punësimit dhe perspektivës së të rinjve në Kosovë”, thuhet në takim.

Bashkëpunimi i mëtejshëm në projekte të reja që kanë për synim zhvillimin ekonomik të Kosovës, shkëmbimin e studentëve dhe përvojave në fusha të caktuara, ishte fokusi i këtyre takimeve që Ministrja Gërvalla realizoi gjatë vizitës së saj zyrtare në Japoni.