Gërvalla në Shkup: Iniciativa e Novi Sadit është e rrezikshme

Zëvendëskryeministrja e Kosovës, njëherësh edhe ministre e Punëve të Jashtme dhe Diasporës, Donika Gërvalla, thotë se nisma rajonale e emëruar tashmë “Open Balkan”, është nismë e rrezikshme dhe përmes saj krijohet përshtypja se rajoni ka alternativë tjetër në rrugën drejt Bashkimit Evropian, transmeton Shqip.com.

Në një konferencë të përbashkët me homologun e saj në Shkup, ku ministrja po qëndron për vizitë zyrtare, ka thënë se nuk ka nevojë për nisma rajonale të tilla derisa shtetet veçse janë pjesë e procesit të Berlinit, që sipas saj hapja e iniciativave paralele nuk paraqet diçka të re.

“Si Republikë e Kosovës, iniciativën e Novi Sadit ndërkohë të minishengenit, që nga dita e djeshme të Ballkanit të Hapur, e konsiderojmë të rrezikshme. Pse e konsiderojmë të rrezikshme, sepse krijohet përshtypja sikur përçohet mesazhi sikur kemi alternativë ndaj rrugës sonë të përbashkët si rajon drejt BE-së, dhe perçimi i këtij mesazhi ne e konsiderojmë që është më i rrezikshëm sa vonesat që mund të ndodhin ndërkohë gjatë procesit tonë të integrimit”, ka thënë ajo.

Kryediplomatja kosovare ka përmendur Procesin e Berlinit në të cilin janë pjesë të gjitha vendet e rajonit, për çka ka thënë se hapja e nismave paralele nuk paraqet diçka të re.

“Ne kemi një proces të përbashkët rajonal ku jemi të gjitha vendet e rajonit, procesi quhet procesi i Berlnit, aty kemi disa vite që përpiqemi të shtyjmë përpara marrëveshjet të cilat prekin të gjithë qytetarët tanë. Në këtë iniciativë Republika e Kosovës është partner i barabartë me pesë shtetet e tjera të Ballkanit, dhe ne konsiderojmë që hapja e iniciativave paralele të cilat në thelb nuk paraqesin diçka të re, është e rrezikshme për atë se si ne e shohim vetë në rajon por edhe si shihemi nga BE. Është përshtypja ime që kjo iniciativë e quajtur më parë minishengen dhe tani e hapur, shtrohet pyetja ndaj kujt, vë një pikëpyetje edhe rreth përcaktimeve gjeostrategjike që ka rajoni ynë, sepse në rajonin tonë jo të gjitha shtetet kanë të njëjtin përcaktim gjeostrategjik”, ka thënë Gërvalla derisa u është përgjigjur pyetjeve të gazetarëve rreth minishengenit.

Nisma rajonale e njohur si minishengen, dje është zyrtarizuar me emrin “Open Ballkan”, e nënshkruar në Shkup nga kryeministri i Shqipërisë, Edi Rama, ai i Maqedonisë së Veriut, Zoran Zaev dhe presidenti i Serbisë, Aleksandër Vuçiq. Kësaj nisme nuk i është bashkuar Kosova, Mali i Zi e as Bosnje e Hercegovina. /Shqip.com