Gërvalla: Deri në fund të vitit presim të aplikojmë për statusin kandidat të BE-së

Ministrja e Punëve të Jashtme dhe Diasporës, Donika Gërvalla ka thënë se në fund të vitit të dorëzojnë do të dorëzojnë aplikimin për statusin e vendit kandidat në Bashkimin Evropian.

Ajo ka thënë se Kosova i plotëson të gjitha parakushtet për një kandidaturë të tillë, por janë duke e pritur kohën e duhur.

“Sa i përket aplikimit për statusin e kandidatit në Bashkimin Evropian, mendojmë se Kosova i plotëson të gjitha kushtet për këtë dhe do të presim deri në fund të vitit për të zgjedhur momentin e përshtatshëm, për ta dorëzuar aplikimin”, u shpreh kryediplomatja, raporton Telegrafi.

Ajo tutje deklaroi se do të punojnë intensivisht që një aplikim i tillë të jetë i suksesshëm.

Mes tjerash, Gërvalla foli edhe për procedurat pas aplikimit të Kosovës për anëtarësim në Këshillin e Evropës.

Ajo tha se presin që pas pushimeve verore të kalohet procedura dhe të fillojë në Asamblenë Parlamentare.

“Ne presim që procesi të mos zgjasë aq shumë sa ka zgjatur për disa vende të rajonit. Procesin e kemi të shëndetshëm dhe gëzon përkrahje politike nga një numër i madh i vendeve anëtare të KiE-së”, përfundoi ajo.

Tutje Gërvalla i prezanton dy projekte për diasporën.

“Programi i dytë i cili është fillimisht një program pilot është një program që ka të bëjë me diplomacinë publike. Është një interesim i natyrshëm i Republikës që të rinjtë që janë lindur e rritur në diasporë që ta njohin Kosovën përtej lidhjeve familjare”, ka thënë Gërvalla.

Po ashtu është bërë e  ditur se platforma “ShijoKosovën” do të lansohet të mërkurën në Gjilan./SHQIP.com