Gazetarët dhe stafi i New York Times hyjnë në grevë

Qindra gazetarë dhe punonjës në “The New York Times” nuk do dalin në punë në 24 orët e ardhshme, kjo është greva e parë e këtij lloji në gazetë në më shumë se 40 vjet.

Punonjësit e redaksisë dhe anëtarët e tjerë të “The NewsGuild of New York” thonë se janë të ngopur nga pazaret që janë zvarritur që nga skadimi i kontratës së tyre të fundit në mars 2021.

Sindikata njoftoi javën e kaluar se më shumë se 1100 punonjës do të bënin një ndalesë pune 24-orëshe duke filluar në orën 12:01 të mëngjesit të së enjtes nëse të dyja palët nuk arrijnë një marrëveshje rreth kontratës.

NewsGuild shkroi në Twitter të enjten në mëngjes se punëtorët, “tashmë janë zyrtarisht në ndërprerje të punës, i pari i kësaj shkalle në kompani në 4 dekada. Nuk është kurrë një vendim i lehtë të refuzosh të bësh punën që të pëlqen, por anëtarët tanë janë të gatshëm të bëjnë atë që duhet për të fituar një redaksi më të mirë për të gjithë”.

Negociatat u zhvilluan të martën dhe të mërkurën, por palët mbetën larg njëri-tjetrit për çështjet duke përfshirë rritjen e pagave dhe politikat e punës në distancë, raporton Associated Press.

Të mërkurën në mbrëmje sindikata tha përmes rrjetit Twitter se një marrëveshje nuk ishte arritur dhe greva do të fillojë.

“Ne ishim gati të punonim për aq kohë sa u desh për të arritur një marrëveshje të drejtë, por menaxhmenti u largua nga tavolina”, shkruhej në Twitter.