Lajme

Gashi merr pjesë në takimin e njërit nga komitetet e Asamblesë Parlamentare të KiE-së

Deputeti i Lidhjes Demokratike të Kosovës e që është edhe anëtarë i Delegacionit të Kuvendit të Kosovës në Asamblenë Parlamentare të Këshillit të Evropës, Arben Gashi është duke marrë pjesë në takimin e Komitetit për Politikë dhe Demokraci, i cili po mbahet në Paris të Francës.

Lajmi është bërë i ditur nga faqja zyrtare e Kuvendit të Kosovës, ku thuhet se Gashi do të marrë pjesë edhe në takimin e nënkomitetit për Demokraci i cili do të mbahet po të njëjtën ditë.

“Në këtë takim pritët të trajtohen shumë tema, si: “Roli i Këshillit të Evropës në parandalimin e vuajtjeve njerëzore si pasojë e konflikteve të armatosura”; “Pasojat politike të agresionit Federatës Ruse mbi Ukrainë”, “Samiti i Reikjavikut i Këshillit të Evropës: të bashkuar rreth vlerave përballë sfidave të jashtëzakonshme”; “Mbështetja e perspektivës evropiane për vendet e Ballkanit Perëndimor”, si dhe shumë tema të tjera”, thuhet në njoftimin e Kuvendit të Kosovës.

Sipas njoftimit, Në temën “Perspektiva Evropiane për vendet e Ballkanit Perëndimor”, fillimisht do të flasë raportuesi paraprak, deputet i delegacionit të Greqisë në këtë organizatë,  George Papanderou.

Po ashtu thuhet se Asambleja Parlamentare e Këshillit të Evropës, në sesionin e pjesës së Tetorit 2022, ka nxjerrë një rezolutë përmes së cilës i jep mbështetje të madhe perspektivës evropiane për vendet e Ballkanit Perëndimor, respektivisht mbështet këto vende në rrugën e tyre drejt anëtarësimit në Bashkimin Evropian.

/Shqip.com