Falsifikon dokumente, arrestohet një person

Policia e Kosovës ka bërë të ditur se është arrestuar një i dyshuar për përfshirje në veprën penale “falsifikim i dokumenteve”.

“Hetuesit policorë nga Sektori për Hetime Financiare i Drejtorisë për Hetimin e Krimeve Ekonomike dhe Korrupsionit (DHKEK), nga një ankues, më 01.08.2023, kanë pranuar informatën se persona të dyshuar përmes dokumenteve të falsifikuara të paraqitura në Agjencisë për Regjistrimin e Bizneseve, në mënyrë të kundërligjshme dhe pa pëlqimin e tij, i kanë bartur pronësinë dhe aksionet e kompanisë te një person tjetër”, thuhet në njoftim për media.  

Tutje, thuhet se, vlera e aksioneve, apo kapitali i kësaj kompanie, sipas ankuesit, është disa milionë euro.

“Policia në koordinim me prokurorinë kompetente, kanë ndërmarr veprime hetimore, janë siguruar prova dhe dëshmi të dokumenteve të falsifikuara siç janë: një autorizim, një vendim për ndryshim të statutit të biznesit dhe një kontrate për falje të aksioneve, me të cilat është bërë edhe ndryshimi i pronësisë dhe aksionarit të këtij biznesi”, thuhet në vazhdim të njoftimit.

Lidhur me rastin është intervistuar i dyshuari M.A., (viti i lindjes 1965, mashkull kosovar) në prezencë të avokatit mbrojtës.

“Pas përfundimit dhe sigurimit të provave dhe dëshmive është iniciuar rasti ‘falsifikim i dokumenteve’ dhe me vendim të prokurorit i dyshuari është dërguar në mbajtje deri në 48 orë”, thuhet në fund të njoftimit.