DW: Linja ajrore për “Kosovo Serbia” dhe për “Kiev Rusia”- falsifikime të qëllimshme

 Në rrjete sociale është duke qarkulluar një fotografi ku shihet një tabelë fluturimesh të një aeroporti.

Në këtë tabele e cila pretendohet që është në aeroportin e Beogradit, jepen destinacione “Kiev Rusi” dhe “Kosovo Serbia”

Por sipas verifikimit të DW, fotografia e cila është shumë e klikuar, është edhe e falsifikuar.

Fluturimi i pretenduar që ka si destinacion “Kosovo Serbia” duket se është provokim i qëllimshëm. Kosova nuk është qytet, por shtet dhe në tabelat e aeroporteve zakonisht nuk shënohet emri i shtetit, por i qytetit ku mbërrin avioni. Po ashtu parlamenti i Kosovës shpalli në vitin 2008 pavarësinë, edhe pse Serbia, Rusia dhe Kina, apo pesë vende të BE-së nuk e njohin atë.

Edhe Kievi është kryeqyteti i Ukrainës dhe jo qytet në Rusi.

Po ashtu nëse e shohim më me kujdes fotografinë, bien në sy falsifikime të tjera. Në anën e majtë, për shembull, në rastin e fluturimeve të supozuara për në Kiev dhe Kosovë janë flamujt e shteteve në vend të logove të linjave ajrore, si në rastin e fluturimeve të tjera.

Kështu fluturimi i pretenduar për në Kosovë me numër W6 4051 është sipas “My Flight Right” numri identifikues i një fluturim të Wizz Air nga Beogradi në Basel-Muhlhouse-Freiburg (MLH).

Edhe fluturimi për Kiev tregon se fotografia është e manipuluar. I pyetur nga DW një zëdhënës i Air Serbia konfirmoi se fluturimi JU600 i përket lidhjes Beograd-Vjenë dhe se Air Serbia nuk fluturon për në Kiev.

Tabela e fluturimeve provë tjetër për manipulimin

Edhe tabela e fotografuar nuk është në aeroportin e Beogradit. I pyetur nga DË një zëdhënës i aeroportit Nikola Tesla në Beograd sqaroi se tabelat dhe ekranet e fluturimeve në këtë aeroport janë ndryshe nga ajo që shihet në fotografi. Aeroporti i Beogradit dërgoi si provë edhe fotografi të tabelave aktuale të ekraneve të fluturimeve.

Në cepin e sipërm djathtas të këtyre fotografive duket edhe logoja “Vinci Airports”. Vinci Airports është një operator privat aeroportesh, i cili menaxhon edhe aeroportin e Beogradit.