Drita e ndeshjeve të mëdha, kthehet e pamposhtur nga Çekia

Drita ka treguar edhe njëherë se është skuadër për ndeshje të mëdha, pasi sot është kthyer me barazimin 0-0 nga udhëtimi te Viktoria Plzen në kuadër të ndeshjes së raundit të dytë kualifikues të Ligës së Konferencës.

Klubi gjilanas është paraqitur mirë dhe është mbajtur për plot 90 minuta në stadiumin “Doosan Arena” të Plzenit.

45 minutat e parë treguan një lojë të fortë dhe agresive nga të dyja skuadrat dhe këtë e tregojnë katër kartonët e verdhë, nga dy për secilën skuadër, të dhënë nga gjyqtari.

Megjithatë, vendasit ishin skuadër më kërkuese dhe patën dy raste të mira shënimi, por ishte portieri Florian Smakiqi që mohoi golin dhe ekipet shkuan në pushim me rezultat të barabartë 0-0.

Në pjesën e dytë, përsëri u zhvillua lojë e njëjtë, me vendasit që sulmuan dhe gjilanasit që mbroheshin, ndërsa morën edhe katër kartonë të verdhë.

Plzeni pati disa raste interesante për gol dhe vlen të theksohet ai i minutës së 80-të kur Jhon Mosquera goditi traversën nga një gjuajte afër penalltisë.

Por, edhe Drita pati rast të mirë me Albert Dabiqaj (86′), i cili gjithashtu nuk arriti t’i ndryshonte shifrat.

Deri në fund të ndeshjes, Drita arriti të mbrohet mirë dhe të marr një barazim të madh 0-0 para ndeshjes kthyese në Prishtinë.

Ndeshja kthyese pritet të zhvillohet në stadiumin “Fadil Vokrri” me 3 gusht.