Hetimet/ Si u “vodh” kontenieri i “BanaKing” në Portin e Durrësit – “truku” ndaj policisë kufitare

Tre nga të arrestuarit nga policia e Durrësit dhe AMP janë lënë në qeli me akuzën e shpërdorimit të detyrës dhe shkelje të rregullave kufitare, ndërsa një vajzë punonjëse e agjencisë doganore është liruar. 

Ata janë arrestuar pasi kanë lejuar nxjerrjen pa kaluar në skaner një kontenier me banane të “BanaKing”.

Pasi është pikasur mungesa e kontenierit ai është rikthyer sërish në port pas afro 2.30-3 orësh duke ndjekur proçedurat standarte të kontrollit dhe ka rezultuar i pastërt. 

Shpesh kontenierët me banane janë përdorur për trafik kokaine ndërsa nuk dihet nëse edhe ky kontenier ka patur apo jo lëndë narkotike.

Kompania Zico e cila sjell “BanaKing” në Shqipëri ka qenë e më herët pjesë e hetimeve ku është kapur drogë dhe staf i saj është arrestuar.

Ndërsa pronari i kësaj kompania Trifon Murataj ka mohuar akuzat duke e cilësuar si një sulm ndaj markës dhe biznesit të bananeve që ai menaxhon dhe droga s’ka qenë asnjëherë e tij.

Ky kontenier sqaruan burimet ka qëndruar në një zonë të Shkozetit dhe pas ndërhyrjes së policisë u rikthye në port.

Nuk mungoi edhe reagimi i ministrit Balla i cili kalimin e kontenierit dhe nxjerrjen e tij pa kaluar në skaner dhe sipas procedurave e ka cilësuar një sëmundje të vjetër.

Njoftimi i Policisë së Shtetit për arrestet

Durrës/Strukturat e Policisë vendore, angazhim maksimal për të garantuar sundimin e ligjit në territor.

Finalizohet operacioni policor i koduar “Sinkroni”, i zhvilluar nga Seksioni për Kontrollin e Kontenierëve i DVP Durrës, në bashkëpunim me Drejtorinë e Hetimit të Agjencisë së Mbikëqyrjes Policore dhe me Prokurorinë e Durrësit. 

Regjistronin të dhëna të rreme, duke shpërdoruar detyrat, në mënyrë që automjete dhe kontenierë t’iu shmangeshin kontrolleve në pkk dhe të kalonin mallra të kontrabanduara, vihen në pranga 4 shtetas.

Vijon puna për kapjen e një 56-vjeçari, i cili dyshohet se duke falsifikuar elementet e sigurisë (plumbçet) të kontenierit të kamionit që drejtonte, ka kaluar mallra të kontrabanduara. 

Në vijim të aksioneve intensive të Policisë, të kryera në kuadër të megaoperacionit kombëtar “Sundimi i ligjit”, kundër paligjshmërive në çdo formë të shfaqjes së tyre, është organizuar dhe finalizuar operacioni policor i koduar “Sinkroni”. Si rezultat i operacionit u vunë në pranga, për veprat penale “Shpërdorimi i detyrës” dhe “Falsifikimi kompjuterik”, të kryera në bashkëpunim, shtetasit:

E. Gj., 35 vjeç, A. K., 52 vjeçe dhe D. M., 41 vjeç, të tre me detyrë inspektorë mbikëqyrës në kompaninë private që merret me përpunimin e mallrave dhe të kontenierëve në portin e Durrësit, si dhe shtetasi A. V., 27 vjeç, me detyrë ndihmësspecialist kontrollor në Policinë Kufitare të portit të Durrësit. 

Nga veprimet hetimore dyshohet se këta 4 shtetas, duke shpërdoruar detyrat, në bashkëpunim me njëri-tjetrin, kanë regjistruar të dhëna të rreme në sistemet kompjuterike, me qëllim lejimin e kalimit pa kontroll doganor, të automjeteve dhe kontenierëve që transportonin mallra të kontrabanduara.

Në vijim të këtyre veprimeve u identifikua dhe u shpall në kërkim shtetasi D. H., 56 vjeç, për veprat penale “Falsifikimi i vulave, i stampave ose i formularëve” dhe “Kondrabanda me mallra të tjera”, pasi dyshohet se ka falsifikuar vulat e sigurisë (plumbçet) të kontenierit të kamionit që drejtonte dhe me të ka kaluar mallra të kontrabanduara. Vijon puna për kapjen e shtetasit D. H..

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.