Digjet dhe raundi i tretë, asnjë emër nga opozita për Presidentin e ri të Shqipërisë

Raundi i tretë i procesit për zgjedhjen e Presidentit është djegur, pasi opozita nuk propozoi asnjë emër në kryesinë e Kuvendit.

Ora 16:00 e kësaj të diele ishte afati i fundit që opozita të jepte propozimin/propozimet e saj, ndërkohë që mazhoranca nuk propozoi asnjë të tillë në raundin e dytë dhe të tretë.

Të hënën Kuvendi do të mblidhet, ashtu siç u dakordua në mbledhjen e fundit të Konferencës së Kryetarëve.

Tashmë për të zgjedhur Presidentin duhen 71 vota dhe jo 84 si në të dyja raundet e para, që do të thotë se mazhoranca mund ta zgjedhë e vetme kreun e shtetit.

Kuvendi do të zhvillojë nesër dy seanca radhazi, një për Presidentin në orën 10:00 dhe një tjetër për rendin e ditës në 11:00.

Sipas Kushtetutës së Shqipërisë, kandidati për President i propozohet Kuvendit nga një grup prej jo më pak se 20 deputetësh.

Për zgjedhjen e Presidentit të vendit, Kuvendi zhvillon deri në pesë votime (raunde). Në votimin e katërt dhe të pestë zgjidhet president kandidati që siguron më shumë se gjysmën e votave të të gjithë anëtarëve të Kuvendit. Votimi i pestë zhvillohet kur në votimin e katërt asnjë kandidat nuk ka siguruar shumicën e kërkuar të votave./Shqip.com