Detajet e atentatit në Prishtinë, shënjestër ishte “Plaku”. Harbim Vitija i plagosur rëndë, autorët të maskuar

Zbardhen detaje të reja nga atentati që tronditi Prishtinën mbrëmjen e kësaj të enjte. Shënjestër i sulmit dyshohet se ka qenë Harbim Vitija, i njohur me nofkën “Plaku”.

Sipas informacioneve të siguruara nga burime të besueshme pranë hetimit, dy persona të maskuar kanë hyrë në një kafiteri dhe kanë shtënë me armë zjarri në drejtim të tij.

Si pasojë e të shtënave, Vitija është goditur në kokë dhe ka pësuar plagë të rënda trupore. Ai është dërguar me urgjencë për trajtim mjekësor dhe ndodhet në Emergjencë, ndërsa gjendja e tij raportohet kritike.

Policia ka dalë në vendin e ngjarjes dhe ka nisur hetimet intensive për identifikimin dhe kapjen e të dyshuarve, të cilët pas sulmit janë larguar në drejtim të panjohur.

Motivet e sulmit ende nuk janë bërë të ditura.