COVID’19: OBSH e shqetësuar për rritjen e rasteve në Evropë

Organizata Botërore e Shëndetësisë (OBSH) është “shumë e shqetësuar” për përhapjen e COVID-19 brenda Evropës, ndërsa kontinenti lufton një valë të re infeksionesh.

Duke folur për BBC, drejtori rajonal Dr Hans Kluge paralajmëroi se rreth 500,000 vdekje të tjera mund të regjistrohen deri në mars, nëse nuk ndërmerren veprime urgjente, transmeton Shqip.com.

Dr Kluge tha se vendosja e masave si përdorimi i maskave – mund të ndihmojë menjëherë.

Paralajmërimi vjen pasi disa kombe raportojnë shkallë rekord të lartë të infeksionit dhe vendosin bllokime të plota dhe të pjesshme.

Dr Kluge tha se faktorë si sezoni i dimrit, mbulimi i pamjaftueshëm i vaksinave dhe dominimi rajonal i variantit më të transmetueshëm Delta janë shkak i përhapjes. 

Ai bëri thirrje për vaksinim dhe zbatim të masave bazë të shëndetit publik si dhe trajtimeve të reja mjekësore për të ndihmuar në luftimin e rritjes.

“Covid-19 është bërë edhe një herë shkaku numër një i vdekshmërisë në rajonin tonë”, tha ai, duke shtuar se “ne e dimë se çfarë duhet bërë” për të luftuar sëmundjen.

Dr Kluge tha se masat e detyrueshme të vaksinimit duhet të shihen si një “zgjidhje e fundit”, por se do të ishte “shumë në kohë” për të pasur një “debat ligjor dhe shoqëror” për këtë çështje.

“Para kësaj ka mjete të tjera si leja për Covid,” tha ai, duke shtuar se ky “nuk është një kufizim i lirisë, përkundrazi është një mjet për të mbajtur lirinë tonë individuale”./SHQIP.com