Cilat vende blejnë më së shumti armë ruse?

Rusia është eksportuesi i dytë më i madh i armëve në botë, pas Shteteve të Bashkuara, duke zënë afërsisht 20 për qind të shitjeve globale të armëve, ka shkruar Al Jazeera.

Sipas këtij mediumi ndërmjet viteve 2016 dhe 2020, Moska ka shitur 28 miliardë dollarë armë në 45 vende.

Rusia eksporton gati 90 për qind të armëve të saj në 10 vende.

Klienti i saj më i madh, India, bleu 23 për qind të armëve ruse për rreth 6.5 miliardë dollarë gjatë pesë viteve të fundit. Gjysma e importeve totale të armëve të Indisë, 49.3 për qind, vijnë nga Rusia.

Kina është blerësi i dytë më i madh i armëve ruse me 5.1 miliardë dollarë gjatë së njëjtës periudhë, e ndjekur nga Algjeria (4.2 miliardë dollarë), Egjipti (3.3 miliardë dollarë) dhe Vietnami (1.7 miliardë dollarë), sipas Institutit Ndërkombëtar të Kërkimit të Paqes në Stokholm.

Rusia eksporton një sërë armësh duke përfshirë avionë, motorë, raketa, automjete të blinduara dhe sisteme të mbrojtjes ajrore.

Avionët përbëjnë gati gjysmën (48.6 përqind) të eksporteve ruse të armëve. Midis 2016 dhe 2020 Rusia dorëzoi rreth 400 avionë luftarakë, duke përfshirë familjen e avionëve Sukhoi dhe MiG, në të paktën 13 vende.

India bleu të paktën gjysmën e tyre. India është gjithashtu një nga vetëm gjashtë vendet në botë që operojnë nëndetëset me energji bërthamore që ka me qira nga Rusia./Shqip.com