Çfarë këshillohej Tony Blair për UÇK-në dhe si u propozua që organizata të futej në zgjedhje?

Ish-kryeministri i Britanisë së Madhe, Tony Blair, kishte pasë shqetësime se ishte parë si shumë i afërt me Ushtrinë Çlirimtare të Kosovës, sipas disa dokumenteve të Arkivit Kombëtar britanik të zbuluara të premten, shkruan sot The Guardian.

Tony Blair u këshillua të punonte me militantë në Kosovë, disa prej të cilëve më pas janë gjykuar për krime lufte, pavarësisht se thuhet se besonin se ata nuk ishin “shumë më të mirë se serbët” krimet kundër njerëzimit të të cilëve ai po kërkonte t’i jepte fund.

Blair, asokohe kryeministër i Mbretërisë së Bashkuar, kishte shqetësime të mëdha se dukej se ishte shumë i afërt me Ushtrinë Çlirimtare të Kosovës (UÇK), e cila po luftonte kundër forcave nacionaliste serbe të udhëhequra nga Slobodan Millosheviq.

Por ai u këshillua: “Në përgjithësi, pikënisja jonë në një konflikt si ky duhet të jetë se armiku i armikut tuaj është miku juaj”.

Në një letër të përgatitur nga John Sawers, asokohe këshilltar për punët e jashtme të Blair dhe më vonë shefi i Shërbimit të Inteligjencës Sekrete, ish-kryeministrit iu tha: “Ne jemi në rrezik të jemi shumë përbuzës. Ne nuk duam ta favorizojmë politikisht UÇK-në ndaj partive të tjera kosovare. Por ne duhet të llogarisim që UÇK-ja po bëhet shumë më e popullarizuar pas asaj që ka ndodhur [në luftërat jugosllave] dhe të pranojmë se ata janë e vetmja parti me një lloj ushtrie”.

Në letrën, dërguar Blair-it dhe ndihmësve të tij të lartë, Sawers sugjeroi se do të ishte e pamundur të çarmatosësh UÇK-në pas konfliktit. Në vend të kësaj, këshilloi ai, do të ishte më mirë të punohej me organizatën për të sjellë zgjedhje.

Në fund të letrës, lëshuar në Arkivin Kombëtar nga Zyra e Kabinetit të premten, një dorë e panjohur ka shkruar: “Unë jam dakord”.

Shënimi e bën të qartë ankthin brenda për natyrën dhe shtrirjen e përfshirjes së Mbretërisë së Bashkuar në konfliktin brutal multi-faksional që shpërtheu në ish-Jugosllavi nga viti 1991 deri në 2001.

Ndërhyrjet e NATO-s përfshinin sulme ajrore kundër forcave të Millosheviqit, i cili vdiq në vitin 2006 ndërsa po gjykohej për krime lufte.

Mbretëria e Bashkuar, nën udhëheqjen e Blair, do të bëhej më pas një nga mbështetësit kryesorë të UÇK-së nën liderin e saj të atëhershëm Hashim Thaçi.

Në prill të këtij viti, ky i fundit u paraqit në bankën e të akuzuarve të një gjykate në Hagë – së bashku me tre kolegë të shquar – të akuzuar për krime lufte që përfshijnë bashkëpunim të dyshuar në vrasjen e 102 personave.

Një zëdhënës i Blair nuk pranoi të komentojë.