Bislimi: Vazhdojmë bisedimet për normalizim të marrëdhënieve

Shefi i delegacionit kosovar në bisedimet me Serbinë, Besnik Bislimi, nuk ka dhënë detaje rreth marrëveshjes.

“Pas marrëveshjes së sotme, ne duhet të vazhdojmë bisedimet tona intensive për propozimin e BE-së, të mbështetur nga Gjermania dhe Franca, për normalizim të plotë të marrëdhënieve”, ka shkruar Bislimi në Twitter.

Përfaqësuesi i Lartë i Bashkimit Evropian për dialogun Kosovë-Serbia ka bërë të ditur se Kosova dhe Serbia kanë arritur marrëveshje për çështjen e targave.

Kjo është bërë e ditur përmes një njoftimi në Twitter.

“Ne kemi një marrëveshje! Me kënaqësi të njoftoj se kryenegociatorët e Kosovës dhe Serbisë nën lehtësimin e BE-së kanë rënë dakord për masat për të shmangur përshkallëzimin e mëtejshëm dhe për t’u përqëndruar plotësisht në propozimin për normalizimin e marrëdhënieve të tyre” ka bërë të ditur Borrell fillimisht.

Më tutje shefi i diplomacisë evropiane ka dhënë detaje të tjera për marrëveshjen.

“Serbia do të ndalojë lëshimin e targave me emërtimet e qyteteve të Kosovës dhe Kosova do të ndërpresë veprimet e mëtejshme në lidhje me riregjistrimin e automjeteve. Do t’i ftoj palët në ditët në vijim për të diskutuar hapat e ardhshëm”- ka shkruar Borrell.

Arritjen e marrëveshje e ka ka konfirmuar edhe Ambasadori i Kosovës në Belgjikë, Agron Bajrami.

“Pas orëve të gjata, arritëm objektivin tonë: kemi një marrëveshje! Tani mund të fillojnë bisedimet intensive për normalizimin e plotë” ka shkruar Bajrami.