Bilçik: Koha për formimin e Asociacionit, këtë vit duhet të përmbyllet marrëveshja

Eurodeputeti, njëherit raportuesi i Parlamentit Evropian për Serbinë, Vladimir Bilçik, ka sëhfaqur shpresën se Prishtina dhe Beogradi të gjejnë vullnetin për normalizimin e marrëdhënieve dhe sivjet të shkohet drejt përfundimit të dialogut.

Bilçik i ka thënë Zërit të Amerikës se BE-ja po i dërgon mesazhe të qarta Aleksandar Vuçiqit dhe Albin Kurtit se në vitin 2024 pret nga ta, zbatimin e marrëveshjeve të arritura për normalizimin e marrëdhënieve mes dyja vendeve.

“Ne po u dërgojmë atyre mesazhe të qarta dhe shpresojmë që ata të gjejnë vullnetin për ta bërë këtë. Nga përvojat e mia me Presidentin Vuçiq, mendoj se ka një mirëkuptim dhe vullnet për të bërë përparim. Këtë e kemi parë, sidomos kur bëhet fjalë për kartat e identitetit, targat, energjia, kur është fjala për prakticitetin në terren. Dhe kjo është e rëndësishme. Mendoj se i takon Prishtinës që të zgjidhë një çështje të madhe me rëndësi për Serbinë dhe mbrojtjen e të gjithë serbëve që jetojnë në Kosovë – dhe kjo është themelimi i Asociacionit të Komunave me shumicë serbe. Është koha që kjo të realizohet. Mendoj se do të mundësojë vërtet progres dhe shpresoj se Prishtina do të ketë fuqinë dhe përgjegjësinë për të vepruar me mirëbesim në ditët dhe javët në vijim. Është e rëndësishme që tensionet në rajon të reduktohen”.

Ai ka folur sërish për sulmin e shtatorit të vitit të kaluar në Banjskë dhe sulmet ndaj ushtarëve të KFOR-it, derisa ka kërkuar hetime të plota për ngjarjet.

“Është absolutisht e domosdoshme që sulmet, si ai në Banjskë, të mos përsëriten. Ashtu siç nuk duhet të përsëriten sulmet ndaj ushtarëve të NATO-s dhe KFOR-it. Ngjarjet e kaluara duhet të hetohen tërësisht në mënyrë që asnjë nga palët nuk do të kishte arsye për të rritur tensionet. Është inkurajuese që Beogradi ka treguar gatishmëri për të inkurajuar serbët që të marrin pjesë në zgjedhje. Shpresoj se zgjedhjet në veri të Kosovës të mbahen dhe të ketë një marrëveshje politike se si të realizohet e gjitha. Rendi i ditës është i qartë dhe kompleks. Këtë vit ne me të vërtetë duhet të shkojmë drejt përfundimit të dialogut”, tha Bilçik.