Behrami i tregon Interit dobësinë e portierit Sommer

Yann Sommer është i përzgjedhuri i Interit për të zëvendësuar portierin Andre Onana në portë dhe marrëveshja mes zikaltërve e Bayern Munich pritet të mbyllet brenda muajit korrik, në mënyrë që Inzaghi të ketë më në fund në dispozicion portierin e tij titullar.

Sommer është një portier i aftë të luajë me këmbë dhe këtë e konfirmon edhe ish-kapiteni i tij te Zvicra, Valon Behrami, i cili nuk ngurron të nxjerrë në pah as dobësitë e portierit helvet.

“Sommer është zëvendësuesi më i mirë për Onanën dhe Interi ka zgjedhur mirë. Ai luan shumë mirë me këmbë dhe ka siguri e personalitet. E vetmja dobësi është në dalje, pasi nuk i pëlqen të largohet shumë nga vija e portës”, deklaroi Behrami.

Yann Sommer pritet t’i bashkohet Interit për shifrën e 4 milionë eurove dhe të firmosë për tre sezone me zikaltrit e Simone Inzaghit.