BE propozon sanksionimin e prodhuesve të dronëve iranian

Bashkimi Evropian do të propozojë sanksionimin e tre individëve iranianë dhe një entiteti për ofrimin e mbështetjes ushtarake për Rusinë për luftën e saj kundër Ukrainës dhe përfshirjen e tyre në sigurimin e Moskës me dronë, sipas një personi të njohur me këtë çështje.

Siç raporton Bloomberg, kompania “Shahed Aviation Industries” është përgjegjës për projektimin dhe zhvillimin e serisë Shahed të dronëve iranianë që janë furnizuar në Rusi dhe aktualisht po përdoren në Ukrainë, tha personi.

Individët janë tre gjeneralë të lartë, të gjithë me poste mbikëqyrëse të nivelit të lartë dhe përfshirje të drejtpërdrejtë në programin UAV të Iranit dhe bashkëpunimin e tij me Rusinë.

Irani ka mohuar vazhdimisht eksportimin e ndonjë arme për përdorim në luftën në Ukrainë.

Paketa e re e masave për Iranin vjen vetëm disa ditë pasi BE-ja sanksionoi policinë morale të vendit dhe entitete të tjera për shtypjen e dhunshme të protestave dhe do të përfaqësonte herën e parë që blloku do të lëvizte kundër një vendi tjetër përveç Bjellorusisë për luftën e Rusisë në Ukrainë.

Ministrat e Jashtëm të BE-së diskutuan dërgesat e supozuara të dronëve kur u mblodhën në Luksemburg të hënën, por nuk ranë dakord menjëherë për të sanksionuar vendin për këtë çështje. Disa shtete anëtare donin të shqyrtonin provat për të konfirmuar se dronët iranianë i ishin dorëzuar Rusisë pas pushtimit të Ukrainës përpara se të vendoste sanksione të reja kundër vendit, thanë zyrtarët.

Zyrtarët ukrainas kanë theksuar përdorimin e dronëve të prodhuar nga Irani në sulmet e fundit ruse në të gjithë Ukrainën që nga mesi i shtatorit, dhe rolin që ata kanë pasur në shënjestrimin e infrastrukturës kritike në të gjithë vendin.

Disa raporte dhe vlerësime të inteligjencës kanë arritur në përfundimin se dronët me shumë gjasa janë dorëzuar gjatë verës.