Artistët kosovar shprehin ngushëllime për vdekjen e regjisores, Burbuqe Berisha

Regjisorja Burbuqe Berisha, ka ndërruar jetë të mërkurën nga sulmi në zemër.

Artistët kosovar kanë shprehur ngushëllime, duke theksuar që vdekja e saj është humbje e madhe për Kosovën.

Në vazhdim janë disa nga ngushëllimet e postuara  nga komuniteti artistik me rastin e ndarjes nga jeta të Burbuqe Berishës. 

“Pusho ne paqe shpirti i bardhë. Ngushëllime familjes”, shkroi këngëtarja Era Istrefi.

‘Zoti te mëshiroftë Buqe’, ka shkruar aktori Shkëlzen Veseli.

“Buqe pusho e qetë, zoti të shpërbleftë me xhenet, na këpute shpirtin bre …”, shkroi aktori Edi Kastrati duke publikuar një imazh bashkë me të.

“Na paska lanë Buqja fizikisht! Lajm shumë i rënde për komunitetin tonë e boshllëku përgjithmonë  në zemrat tona. Ngushëllime familjarëve e kolegëve. Pushoftë në Paqe shpirti i saj i mrekullueshëm.”, shkroi aktorja e deputetja kosovare, Adriana Matoshi.

Po ashtu, Ministria e Kulturës, Rinisë dhe Sportit është shprehur thellësisht e prekur nga vdekja e regjisores së filmit dhe teatrit, Burbuqe Berisha.

Përmes një njoftimi, MKRS i ka shprehur ngushëllime familjes, miqve dhe gjithë komunitetit artistik.

“Me pikëllim ju njoftojmë se sot në mesditë në Ministrinë e Kulturës papritmas ka ndërruar jetë regjisorja e filmit dhe teatrit Burbuqe Berisha. Jemi thellësisht të prekur nga kjo ngjarje dhe u shprehim ngushëllime familjes, miqve dhe gjithë komunitetit artistik.

Burbuqe Berisha ishte regjisore e një numri të konsiderueshëm të filmave të shkurtër, të gjatë, dokumentarë, serive televizive, shfaqjeve teatrore dhe fituese e disa shpërblimeve në festivale të filmit dhe teatrit me karakter vendor e ndërkombëtar”, thuhet ndër tjerash në njoftim./SHQIP.com