Arrestohet një person në Gjakovë, i konfiskohen dy armë dhe municion

Policia e Kosovës ka njoftuar se me datën 16.03.2023, Stacioni Policor në Gjakovë ju ka përgjigjur një rasti kanosje të raportuar në fshatin Damjan-Gjakovë.

“Zyrtarë Policorë të Njësisë së Hetimeve në kuadër të këtij stacioni, kanë arritur të identifikojnë dhe të arrestojnë të dyshuarin B. D., (mashkull, shtetas i Republikës së Kosovës, lindur në vitin 1992).

Në posedim të të dyshuarit janë gjetur dhe konfiskuar dy pistoleta dhe 30 copë fishekë të cilat ai i posedonte në mënyrë të paautorizuar”, thuhet në komunikatën e Policisë.

Sipas njoftimit me vendim të Prokurorit të Shtetit (në koordinim me të cilin janë ndërmarr të gjitha veprimet hetimore) i dyshuari është ndalur në mbajtje për 48 orë dhe është iniciuar rast “Kanosje” dhe “Mbajtje në pronësi, kontroll ose posedim të paautorizuar të armëve”.