Amnistia/ Alibeaj: PS u tërhoq nga drafti fillestar ku faleshin të dënuarit për korrupsion nga GJKKO

Sekretari i Përgjithshëm i Partisë Demokratike, Enkelejd Alibeaj deklaroi përmes një konference urgjente për mediat se PS është tërhequr nga drafti fillestar i amnistisë.

Alibeaj tha se PD ka insistuar që amnistia të ishte në dobi të njerëzve dhe jo të korruptuarve.

Ai shton më tej se PD do të japë dakordësinë për projektligjin e aministisë duke përfshirë në të edhe protestuesit e arrestuar apo proceduar pavarësisht se kur ka ndodhur ngjarja.

Deklarata e plotë
Partia Demokratike është e vendosur për të votuar vetëm një Projekt-ligj për Amnistinë Penale, i cili i shërben qytetarëve të thjeshtë dhe të pambrojtur dhe nuk përfshihen në të zyrtarët e hetuar nga SPAK dhe të gjykuar në GJKKO-ja.

Të qëndruarit në parime dhe në vlera, për Partinë Demokratike nuk janë kushtëzime, por janë e vetmja rrugë dhe zgjidhje për një amnisti në dobi të njerëzve dhe jo në dobi të të korruptuarëve.

Për ne, gjuha e arrogancës dhe e kërcënimit, është e papranueshme, sepse kemi qenë të qartë dhe vijojmë të jemi në raport me ato që kërkojmë, duke i bërë publike.

Partia Demokratike e Shqipërisë nuk kërkon pazar dhe nuk do gjë të votohen ligje tinëzisht dhe fshehurazi, por gjithçka do ta bëjë në transparencë të plotë, ku të prevalojë interesi i publikut.

Ne e mirëpresim tërheqjen e mazhorancës nga mospërfshirja e të dënuarëve për korrupsion nga GJKKO, duke qenë kjo një mbështetje e pakushtëzuar për institucionet e SPAK-ut dhe të GJKKO-së, dhe japim dakordësinë tonë që në amnisti të përfshihen të gjithë protestuesit, pavarësisht kohës dhe periudhës në të cilën kanë protestuar.