Albin Kurti mesazh ngushëllimi për Ismail Kadarenë: Arti dhe kultura jonë i kanë borxh të pamatshëm oqeanit të mendjes së tij

Kryeministri i Kosovës, Albin Kurti ka reaguar në lidhje me ndarjen nga jeta të shkrimtarit Ismail Kadare, i cili humbi jetën mëngjesin e sotëm në moshën 88-vjeçare. 

Përmes një postimi në rrjetet sociale, Kurti thekson se sot u nda nga jeta shkrimtari më i madh i të gjitha kohërave.

“Ne humbëm shkrimtarin më të madh të të gjitha kohërave, bota humbi shkrimtarin e saj më të madh të gjallë. Porsa hymë në gjysmën e dytë të vitit 2024, Kadare mbylli sytë përgjithmonë. Por sytë tanë kanë parë e do të shohin shumë më mirë për shkak të imagjinatës dhe dijes së Ismail Kadaresë.

Kur ai mbyllte sytë në të gjallë të tij dhe mendohej për malet e Shqipërisë dhe greminat e historisë, teksa qëndiste mijëra faqe me shqipe të bukur si qiell, ne kolektivisht shikonim më qartë e dukeshim më mirë, mendonim më thellë e mësonim më shumë.

Arti dhe kultura jonë i kanë borxh të pamatshëm oqeanit të mendjes së tij. Anija e romaneve të Kadaresë do të lundrojë pafundësisht, për aq sa bota do të ketë lexues dhe shqipja shqiptarë. Ngushëllime të gjithëve.”, shkruan Kurti.