Alba po ribashkohet me Messin te Inter Miami
Shqip
Jordi Alba duket se karrierën do ta vazhdojë përtej Evropës, ku skuadra amerikane Inter Miami është favorit i madh për t’i siguruar shërbimet e tij.
Mbrojtësi i majtë u largua pas 11 viteve nga Barcelona ku fitoi të gjithë trofetë e mundshëm me gjigantin spanjoll.
34-vjeçari duket se karrierën do ta vazhdojë në elitën e futbollit amerikan MLS me fanellën e Inter Miamit, ku do të bashkohej me Lionel Messin dhe Sergio Busquets.
Gazeta prestigjioze spanjolle “Marca”, ka raportuar se mes lojtarit dhe klubit amerikan kanë nisur kontaktet e para dhe negociatat janë në rrugë të mbarë.
Përkundër se Alba pasi fitoi trofeun e Ligës së Kombeve, ka thënë se është i gatshëm të luajë në nivele të larta në Evropë, duket se ish-shokët e skuadrës si Messi e Busquets e kanë bindur për tu transferuar në MLS.
Negociatat mes palëve janë duke u zhvilluar në shpejtësi dhe nëse shkon gjithçka sipas planit atëherë Inter Miami pritet ta zyrtarizojë anësorin spanjoll në 72 orët e ardhshme.
Alba këtë edicion zhvilloi 30 ndeshje zyrtare me Barcelonën, ku realizoi dy gola dhe dhuroi gjashtë asistime.
/Shqip.com
