Alarm për cunami pas tërmetit me magnitudë 6.9 ballë në Tajvan

Sot gjatë ditës së diele, një termet me magnitudë prej 6.9 ballë ka goditur Tajvanin juglindor.

Siç raporton CNN, Shërbimi Gjeologjik i Shteteve të Bashkuara (USGS) ka njoftuar se valë të rrezikshme të cunamit janë të mundshme përgjatë vijës bregdetare brenda një rrezeje prej 300 km pas goditjes nga tërmeti.

Tërmeti goditi qytetin Chishang në juglindjen rurale të Tajvanit dhe kishte një thellësi prej 10 kilometrash.

Agjencia Meteorologjike e Japonisë lëshoi një paralajmërim për cunami për ishullin Miyako në Detin e Kinës Lindore,por agjencia më vonë e hoqi paralajmërimin.

Fotografitë treguan ndërtesa të shembur në Tajvan jugor pas tërmetit të fuqishëm. USGS fillimisht e regjistroi atë në 7.2, përpara se ta ulte atë në 6.9.

Tre vetë janë bllokuar nën gërmadhat e një ndërtese, njoftoi Agjencia Qendrore e Lajmeve (CNA) zyrtare e ishullit. Një person i katërt u shpëtua.

Rreth 20 pasagjerë u evakuuan pasi një tren u prish në zonë, por nuk pati viktima nga incidenti, tha Administrata e Hekurudhave të Tajvanit.

Kolas Yotaka, një ish zëdhënës presidencial që kandidon për zgjedhjet lokale në qarkun Hualien, tha se dëmet u raportuan gjithashtu në një shkollë lokale.

Presidenti i Tajvanit Tsai Ing-wen aktivizoi Qendrën Qendrore të Operacionit të Emergjencës të ishullit pas tërmetit. Banorëve tajvanezë u është kërkuar të qëndrojnë vigjilentë për të shmangur pasgoditjet e mundshme.

Zëdhënësi i ministrisë së mbrojtjes së Tajvanit Sun Li-fang tha se rreth 110 ushtarë janë vendosur gjithashtu në qarkun Hualien, përgjatë bregdetit lindor të ishullit për të ndihmuar me përpjekjet e ndihmës ndaj katastrofave./Shqip.com