AGK-ja: 2023-ta me më së shumti kërcënime e sulme ndaj gazetarëve e mediave

Asociacioni i Gazetarëve të Kosovës, thotë se 2023-shi është viti me më së shumti raste të kërcënimeve dhe sulmeve ndaj gazetarëve e mediave.

AGK-ja është shprehur mirënjohëse ndaj gazetarëve për informimin e qytetarëve në kushtet në të cilat kanë raportuar.

“Gazetarët dhe kameramanët, si asnjëherë më parë rrezikuan sigurinë e tyre fizike duke raportuar në kushte të jashtëzakonshme, në muajin maj dhe qershor nga veriu i Republikës së Kosovës. Andaj, ju jemi mirënjohës që misionin për informimin e qytetarëve, e bëtë në kushte tejet të rënduara, pa mjetet e nevojshme të punës, dhe e pa u frikësuar. Falënderim e mirënjohje edhe për të gjithë kolegët tjerë që kanë raportuar nga terrenet e tjera të ndryshme, e janë kërcënuar nga qytetarë, zyrtarë, pjesëtarë të sigurimit dhe persona publik”, shkruan në njoftim.

Tutje, AGK-ja ftoi që të mos hezitojnë as në të ardhmen t’i raportojnë rastet e ngjashme.