Gjimnasti rus thotë se nuk është penduar që ka veshur simbolin ‘Z’ në podium – pranë atletit ukrainas

Gjimnasti rus Ivan Kuliak , i cili është kritikuar gjerësisht jashtë Rusisë për veshjen e një simboli pro-luftës në një podium pranë një atleti ukrainas, thotë se do të “bënte saktësisht të njëjtën gjë” nëse i jepet një mundësi tjetër, sipas mediave shtetërore ruse, shkruan CNN.

20-vjeçari u dënua nga Federata Ndërkombëtare e Gjimnastikës (FIG) për “sjelljen e tij tronditëse” në një ngjarje të Kupës së Botës të gjimnastikës në Doha, Katar, fundjavën e kaluar.

Kuliak mbante një simbol ‘Z’ të ngjitur në triko ndërsa qëndronte pranë gjimnastit ukrainas Illia Kovtun në podium. Kovtun fitoi medaljen e artë,teksa Kuliak mori të bronztën.

Shenja “Z” është shfaqur në tanke dhe automjete të përdorura nga ushtria ruse në operacionet e saj në Ukrainë dhe që atëherë është bërë një simbol i mbështetjes për pushtimin e Ukrainës.

Videot propagandistike në mediat sociale duket se tregojnë mbështetësit e Presidentit rus, Vladimir Putin të veshur me veshje me simbolin “Z”, duke valëvitur flamujt rusë dhe duke brohoritur parulla pro-ruse.

“Nëse do të kishte një shans të dytë dhe do të më duhej sërish të zgjidhja nëse do të dal me shkronjën “Z” në gjoks apo jo, do të bëja saktësisht të njëjtën gjë”, citohet të ketë thënë Kuliak në një media të kontrolluar nga Rusia e quajtur “Rusia Today”.

“E pashë me ushtrinë tonë dhe pashë se çfarë do të thotë ky simbol. Do të thotë për fitore dhe për paqe”.

Nuk i kam uruar asgjë të keqe askujt, thjesht kam treguar pozicionin tim. Si sportist do të luftoj gjithmonë për fitore dhe do të qëndroj për paqen”, ka thënë ai – sipas CNN.

Pasi ka marrë shprehje mbështetjeje nga kreu i organit drejtues të sportit të tij në Rusi, Federata e Gjimnastikës Artistike të Rusisë (FSGR), Vasily Titov, Kuliak thotë se ishte i mërzitur nga atletët ukrainas kur ata shfaqën flamurin e tyre kombëtar në ngjarjen në Doha. .

Sipas rregulloreve të FIG në atë kohë, gjimnastët rusë në këtë ngjarje lejoheshin të garonin vetëm si atletë neutralë dhe nuk mund të shfaqnin asnjë simbol kombëtar.

FIG konfirmoi në një deklaratë se do t’i kërkonte Fondacionit të Etikës së Gjimnastikës (GEF) të hapte procedura disiplinore kundër Kuliak. GEF i tha CNN se nuk mund të komentonte për çështjet në pritje ose të mundshme si çështje procedurale.

Që nga e hëna, atletët dhe zyrtarët rusë dhe bjellorusë, përfshirë gjyqtarët, nuk lejohen të marrin pjesë në garat zyrtare të sanksionuara nga FIG, pas këshillave të Komitetit Olimpik Ndërkombëtar.

Kjo vjen pasi Komisioneri i Lartë i OKB-së për Refugjatët Filippo Grandi vlerëson se të paktën dy milionë refugjatë janë larguar. /CNN