Kuvendi nesër mban seancë të jashtëzakonshme për shtrenjtimin e energjisë elektrike

Kuvendi i Kosovës do të mbajë të hënën, më 24 janar seancë të jashtëzakonshme.

Në rend dite është debati parlamentar lidhur me shtrenjtimin e rrymës.

Mbledhja e Kryesisë së Kuvendit do të mbahet në ora 11: 00 ndërkaq seanca pritet të nisë në ora 12:00.

Debati parlamentar vjen pasi Zyra e Rregullatorit për Energji ka njoftuar se do të shqyrtojë tarifat e energjisë elektrike, në bazë të kërkesës së Operatorit të Sistemit të Shpërndarjes KEDS dhe Furnizuesit për Shërbim Universal për Energji Elektrike.

ZRRE-ja javën e kaluar ka dalë me propozime për çmimet e rrymës.

Ajo i ka ndarë konsumatorët në pesë kategori: A, B, C, D dhe E.

Propozimi i ZRRE-së aktualisht është në konsultim publik.

Në rast se propozimi miratohet atëherë fatura e muajit shkurt do t’iu shkojë konsumatorëve me rritje.

Ndërkaq, ky propozim është kundërshtuar nga partitë opozitare në seancën e Kuvendit të mbajtur të enjten e kaluar.

Aleanca për Ardhmërinë e Kosovës propozoi një projekt-rezolutë përmes së cilës kërkohej që të mos ketë ngritje të çmimeve, por ajo nuk u miratua pasi nuk gjeti edhe mbështetjen e Vetëvendosjes që ka numrin më të madhe të deputetëve në Kuvend./Shqip.com